Balla: PS do të ofrojë politikanët më të kualifikuar

Sekretari i Përgjithshëm i PS-së, Taulant Balla, tha dje se Partia Socialiste ka detyrimin që të mundësojë përzgjedhjen e politikanëve më të mirë, më të kualifikuar dhe më të përkushtuar në zgjedhjet e 25 prillit. “Përzgjedhja e kandidatëve më të kualifikuar nuk vjen vetëm si rrjedhojë e listave të hapura, por edhe si nevojë e sfidave të paprecedenta që po përjetojmë lokalisht dhe globalisht”, tha Balla. Sipas tij, procesi “Deputeti që duam” e ka zanafillën te listat e hapura. “Zanafillën e ka te Reforma Zgjedhore, që shënoi moment historik me hapjen e listave. Kjo ishte arsyeja pse u mor kjo iniciativë. Jam i entuziazmuar për interesin e lartë, të shprehur në platformën ‘Deputeti që duam’. Komisioni duhet të zgjidhte më të mirët në qindra aplikime. Shqipëria s’ka më asnjë lidhje tashmë me çfarë ishte 7 vite më parë. Ky rrugëtim nuk ishte aspak i lehtë”, u shpreh Balla. Sekretari i Përgjithshëm i PS-së u shpreh se “pavarësisht këtij rrugëtimi, vullneti për të qenë pjesëmarrës në vendimmarrjen publike nuk duhet të shuhet në asnjë çast. Pasi vetëm me qytetarë të ndërgjegjshëm mund të kemi demokraci më cilësore dhe politika publike gjithëpërfshirëse”. “Është një proces që do vijojë disa ditë, në një akademi të mirëfilltë politike. Lektorë do të jenë përfaqësues të parlamentit europian, përfaqësues nga parlamentet e vendeve të BE-së, politikanë të rëndësishëm, trajnerë të spikatur në fushën e shkencave politike. Në përfundim të kësaj akademie, disa do të kenë nderin të jenë në skuadër, kurse të tjerët i ftojmë të bashkohen me PS-në”, – tha Balla. “Projekti i integrimit europian po ashtu është një sfidë konstante, prej dy dekadash tashmë, e cila për shkak edhe të momentumit që ndodhemi kërkon njerëz të kualifikuar në shumë drejtime. Shumë nga ju pjesëmarrës janë profesionistë të shkëlqyer në fushat përkatëse dhe jam i bindur që do të jenë një vlerë e shtuar në politikën shqiptare”, nënvizoi Balla.