Si u përlesh kambisti me grabitësit në oborrin e shtëpisë, i morën 10 milionë lekë
Tre persona të maskuar dhe armatosur grabitën Shefqet Muçën, sapo doli nga shtëpia. Biznesmeni neutralizoi një nga autorët
Një ngjarje e rëndë ka ndodhur mëngjesin e djeshëm në qytetin e Korçës, ku tre persona të maskuar dhe të armatosur u futën në shtëpinë e një kambisti.
Prania e grabitësve është vënë re nga vetë biznesmeni dhe familja e tij, mes të cilëve ka pasur edhe përleshje fizike. Pavarësisht kësaj, grabitësit arritën t’i merrnin shumën prej 100 milionë lekësh të vjetra, ndërsa ai jo vetëm u përlesh me ta, por edhe arriti të kapë njërin dhe ta mbajë derisa mbërriti Policia. Uniformat blu njoftuan se ngjarja ndodhi rreth orës 06:10 minuta të mëngjesit të së hënës, kur kambisti Shefqet Muça u sulmua nga 3 personat e armatosur SI NDODHI NGJARJA Kambisti Muça ishte duke dalë nga banesa e tij, një shtëpi private në lagjen Nr. 1 të qytetit të Korçës dhe në dorë mbante një çantë, brenda së cilës kishte vlerën monetare.
Shumën prej 100 milionësh ai do ta konvertonte në euro dhe dollarë, të cilat i duheshin për në pikën e tij të “Exchange”-it. Por, ndërsa ende nuk kishte arritur të mbyllte mirë derën e shtëpisë, Muça u sulmua nga persona të cilët dolën befasisht nga rruga përbri banesës së tij dhe nën kërcënimin e armës u sulën drejt tij duke i marrë çantën ku ndodheshin lekët. Menjëherë ai reagoi duke u konfliktuar fizikisht me ta dhe ndërsa grabitësit e goditën, zhurmat i dëgjuan anëtarët e tjerë të familjes, bashkëshortja dhe djali i tij të cilët dolën me vrap për t’i shkuar në ndihmë. Grabitësit pasi arritën t’i shkëpusnin çantën nga duart u përpoqën të largoheshin me vrap, por Muça i ndoqi ata dhe pak metra më tutje kapi njërin prej agresorëve dhe nisën të konfrontoheshin edhe fizikisht. Edhe djali dhe bashkëshortja shkuan për ta ndihmuar kambistin, ndërsa ai arriti të shtrinte përtokë njërin prej autorëve dhe pavarësisht kërcënimeve të 2 shokëve të tij Muça nuk e la të ikte, duke pritur Policinë të vinte në vendngjarje. PËRLESHJA FIZIKE Si pasojë e përleshjes me grushte dhe sende të tjera Muca, dhe familja e tij pësuan lëndime të lehta në pjesë të ndryshme të trupit e së bashku me ta edhe njeri prej grabitësve, i cili u arrestua nga Policia dhe u identifikua si Agim Çaçi, 41 vjeç nga Durrësi. Për familjen Muça ky ishte rasti i katërt që sulmohen me qëllim grabitjen, ndërsa sipas tyre gjithçka ndodhi brenda pak minutash. Ndërsa të bërtiturat dhe zhurmat e krijuara si pasojë e përleshjes kanë zgjuar edhe fqinjët, të cilët kanë dalë jashtë dhe i kanë shkuar në ndihmë kambistit deri në momentin e mbërritjes së Policisë.
FQINJI Ndërkohë, fqinji i familjes Muça ka treguar gjithë ngjarjen, sipas tij, një nga autorët e kishte kapur vetë Shefqeti, të cilin ia kishte hequr nga duar pasi po e qëllonte për ta vrarë. “Dëgjova ulërima dhe dola. Ishte qetësi dynjaja dhe thashë ç’po ndodh. Thirr njëri, thirr tjetri, e shoqja thërriste me të madhe. Nuk më shkoi mendja, kur u afrova pashë gjithë skenën. Shefqeti i gjakosur nga fytyra, gruaja e goditur, djali i tij ka ndrydhur dorën, unë vajta vetëm sa ia hoqa nga dora. Ai e mbante të shtrirë përdhe, ishte gati ta vriste. Nga fytyra, Shefqetit i rridhte gjak dhe atij që e kishte grabitur i dukeshin duart që i mbante lart se ky nuk e linte të lëvizte. Shefqeti më tha që do ta vriste. Më tregoi që i kishte vajtur tjetri, shoku i këtij me pistoletë dhe ia mbante në kokë. Ai i tha lëshoje, Shefqeti i tha “nuk e lëshoj më vrit po deshe”. Pastaj ngaqë u bë rrëmujë ata kishin ikur me vrap. Unë pashë me doreza autorin, nuk e vura re kishte maskë apo jo, për të mos e vrarë fare e hoqa Shefqetin”, tregoi fqinji.