Sekuestrohet pasuria e grabitësve të Rinasit
Nën sekuestro, truall e apartamente të Klement dhe Eldi Çala
Prokuroria e Elbasanit ka sekuestruar pasurinë e dy prej grabitësve të Rinasit, Klement dhe Eldi Çalës. Sipas Prokurorisë, hetimi ka nisur bazuar në veprimet e kryera nga shtetasi Dritan Ekmekçiu, i cili kishte marrëdhënie financiare të dokumentuara si dhe marrëdhënie qiraje të padokumentuar me Pullumb Çalën, të atin e Klement dhe Eldi Çalës. “Prokuroria e Rrethit Gjyqësor Elbasan ka regjistruar po ashtu në datë 06/ 09/2019 procedimin penal Nr. 1676, për veprat penale të parashikuara nga nenet 180 e 287 të Kodit Penal, pa autor, mbi bazën e akteve hetimore të sjellë nga Drejtoria Vendore e Policisë Elbasan. Ky procedim penal lidhet me veprimet e kryera nga shtetasi Dritan Ekmekçiu, në kuadër të elementeve të veprave penale të parashikuara nga nenet 180 e 287 të Kodit Penal. Ky shtetas ka hyrë në marrëdhënie financiare të dokumentuar si dhe në marrëdhënie qiraje të padokumentuar me shtetasin Pullumb Çala, i ati i shtetasit Klement Çala”, njoftoi Prokuroria. Me vendimin e Gjykatës së Rrethit Gjyqësor Elbasan është vendosur, ndër të tjera: Vendosja e sekuestros preventive mbi pasuritë e paluajtshme: Pasurinë e llojit apartament, me sipërfaqe 50 m², e gjendur në lagjen “Vullnetari”, Elbasan, regjistruar në emër të shtetasve Pullumb Shefqet Çala dhe Elida Luan Çala; Pasurinë e llojit arë + truall me sipërfaqe 500 m², si dhe ndërtesë 1 kat e llojit njësi, me sipërfaqe 167,9 m², e gjendur në fshatin Kusarth, Bashkia Elbasan, regjistruar në emër të shtetasve Eldi Pullumb Çala dhe Elida Luan Çala; Pasurinë e llojit arë me sipërfaqe 809,5 m², e gjendur në fshatin Kusarth, Bashkia Elbasan, në emër të shtetasve Alkond Ferdinand Bengasi,
Esunela Ferdinand Qevani dhe Alert Ferdinand Qevani, ku në datë 14/12/2017 është regjistruar kontrata e sipërmarrjes Nr. 4788/2867, datë 14/10/2017, me investitorë shtetasit Elida Luan Çala, Eldi Pullumb Çala dhe Pullumb Shefqet Çala. Vendosja e masës së sigurimit pasuror të sekuestros preventive mbi 50% të kuotave të zotëruara nga shtetasi Eldi Pullumb Çala në shoqërinë tregtare “Alba Fashion Confession”. Në kuadër të këtij procedimi penal, në datë 16 dhjetor 2020 është marrë i pandehur dhe akuzuar për kryerjen e veprës penale të parashikuar nga neni 287/1 i Kodit Penal shtetasi Klement Çala. Me vendimin e datës 30/12/ 2020, nga aktet e procedimit penal Nr. 1285 të vitit 2019, janë ndarë aktet e procedimit penal Nr. 1676 të vitit 2019, pasi nga hetimet nuk kanë rezultuar të dhëna që justifikojnë bashkimin e procedimeve penale. Në përfundim të hetimeve paraprake, duke i konsideruar të plotë veprimet hetimore nga prokurori i çështjes është përpiluar kërkesa me objekt “Dërgimin për gjykim” të kësaj çështjeje penale në Gjykatën e Rrethit Gjyqësor Elbasan.