Prokuroria, hetim të thelluar për korrupsion në Spitalin Covid, qeveria mban sekret paktin për vaksinat
Dokumenti i qeverisë: “Marrëveshja me ‘Pfizer’ nuk do të publikohet, institucionet kanë detyrimin të mos e bëjnë publike”
Nuk ka një marrëveshje të zbardhur, nuk ka fond të shprehur në shifra, por ka vetëm një dokument më pak se dy faqe që në vend që të hedhë dritë mbi sigurimin e vaksinës antiCOVID, shton edhe më tepër pikëpyetjet.
I miratuar me nxitim në fundjavë, për t’i hapur rrugë mbërritjes së 195 flakonëve “dhuratë”, Akti Normativ është botuar dje në Fletoren Zyrtare. Por ndryshe nga çfarë pritej, qeveria ka mbajtur sekret marrëveshjen me kompaninë amerikane të vaksinave “Pfizer”. “Marrëveshja për prodhimin dhe furnizimin, nga dhe ndërmjet ‘Pfizer Export BV’ dhe Ministrisë së Shëndetësisë dhe Mbrojtjes Sociale, ministrit të Shtetit për Rindërtimin dhe Institutit të Shëndetit Publik, për shkak të sekretit tregtar dhe kërkesës së shprehur në marrëveshje nga ‘Pfizer Export BV’, nuk do të publikohet në asnjë website të institucioneve, apo në Fletoren Zyrtare. Të gjitha institucionet e përfshira në dhënien e mendimit, të miratimit apo janë pjesë e procesit, kanë detyrimin të mos bëjnë publike marrëveshjen bashkëlidhur këtij Akti Normativ apo pjesë të saj”, thuhet në Aktin Normativ. Jo vetëm kaq, qeveria nuk ka bërë të ditur as sasinë e fondit që do të përdoret për të siguruar 500 mijë dozat anti-COVID. “Efektet financiare që rrjedhin nga marrëveshja bashkëlidhur këtij Akti Normativ, përballohen nga fondi rezervë i buxhetit të shtetit, për vitin 2021”.
AKTI NORMATIV Përmes dokumentit i është dhënë “ok” Ministrisë së Shëndetësisë për nënshkrimin e marrëveshjes, si edhe janë autorizuar institucionet si Agjencia e Kombëtare e Barnave dhe Instituti i Shëndetit Publik për importin e vaksinave si edhe përdorimin e tyre në popullatë. “Autorizohet Instituti i Shëndetit Publik të administrojë procesin e transportit, të ruajtjes, të magazinimit, të shpërndarjes, të përdorimit në popullatë të vaksinës anti-COVID dhe fushatën e vaksinimit, si për sasinë dhe llojin e përcaktuar në këtë marrëveshje, ashtu dhe për çdo sasi dhe lloj tjetër jashtë kësaj marrëveshjeje, sipas kushteve të përcaktuara nga prodhuesi, duke lidhur kontrata direkte me kontraktorët për mallra, punë dhe/ose shërbime për plotësimin e këtyre detyrimeve”, thuhet në dokument ku vihet në dukje po ashtu se Policia e Shtetit të marrë masa për të garantuar sigurinë gjatë transportit dhe sigurinë e ambienteve ku do të ruhet dhe administrohet vaksina anti-COVID.
LEHTËSITË Po dje, Këshilli i Ministrave ka marrë vendimin për heqjen e tarifës doganore për vaksinat kundër koronavirusit që do të importohen në vendin tonë. Në ndryshimet e bëra në VKM-në nr. 1087 “Për miratimin dhe publikimin zyrtar të nomenklaturës së kombinuar të mallrave, 2021”, thuhet që vaksinat anti-COVID do të importohen pa taksë. Të hënën në vendin tonë mbërritën 975 dozat e para të vaksinës “Pfizer” dhe prej tri ditësh ka nisur vaksinimi i mjekëve, infermierëve të spitaleve COVID, epidemiologëve në vend dhe paralelisht pritet dhe nisja e vaksinimit të të moshuarve mbi 75 vjeç.