Për korrupsion, Prokuroria nis hetim të thelluar në spitale
Zbardhet skema e mashtrimit, si sanitarja i mori pacientes me koronavirus 8 milionë lekë, u shtir si infermiere
Prokuroria e Tiranës ka nisur hetimet lidhur me skandalin e denoncuar në media mbi korrupsionin ne Spitalin “Shefqet Ndroqi”, i cili tashmë shërben si spital COVID.
Në pranga është vënë shtetasja Tire Alldervishi, sanitare në këtë spital, e cila është denoncuar nga vajza e një pacienteje që ka ndërruar jetë si pasojë e virusit. Tire Alldervishi, që punonte si sanitare në spitalin “Shefqet Ndroqi”, akuzohet se u hoq si infermiere dhe i mori vajzës së pacientes me koronavirus para për t’i shërbyer. Pacientja me COVID ishte shtruar në spital më 28.11.2020 dhe ka ndërruar jetë po në këtë spital më datë 25.12.2020. Komunikimet nëpërmjet Tire Alldervishit dhe Eltjana Sinanajt janë bërë si verbalisht, ashtu edhe përmes rrjetit të komunikimit “WhatsApp” dhe provat materiale do të përdoren nga Prokuroria. MASHTRIMI SIPAS
PROKURORISË Prokuroria pranë Gjykatës së Shkallës së Parë Tiranë ka regjistruar më datë 13.01.2021 procedimin penal në ngarkim të shtetases Tire Alldervishi për kryerjen e veprës penale të “Mashtrimit”, të parashikuar nga nenet 143/2 të Kodit Penal. Shtetasja Eltjana Sinanaj, e cila ka bërë kallëzim penal ndaj shtetases Tire Alldervishi e datëlindjes 15.03.1962, pasi sipas saj, i ka marrë disa shuma parash të konsiderueshme për t’i shërbyer mamasë së kallëzueses, e cila ishte e shtruar në spital me Covid-19, duke iu prezantuar si infermiere, ndërkohë që ishte sanitare e spitalit. Gjithashtu, në emisionin “Stop” të datës 12.01.2021 janë transmetuar pamjet për ngjarjen e ndodhur. Në datën 28.11.2020 mamaja e kallëzueses është shtruar te Spitali Universitar “Shefqet Ndroqi” pasi ka rezultuar pozitive me COVID-19 dhe ka ndërruar jetë po në këtë spital me datë 25.12.2020. Në derë i është paraqitur një shtetase e veshur si infermiere dhe i ka thënë që është infermiere në spitalin “Shefqet Ndroqi”. Kjo shtetase ishte Tire Alldervishi dhe që më vonë ka marrë vesh se punonte si sanitare në këtë spital. Që në momentin e parë, ajo i ka kërkuar një shumë parash, prej 2000 lekësh, në mënyrë që t’i jepte telefonin së ëmës së denoncuese, duke i thënë që po e bënte për atë edhe pse nuk e kishte parë asnjëherë më përpara. Më pas i thotë që ta presë në lokal. Kur shkon në lokal, i ka thënë: “Meqenëse infermierët e tjerë nuk lejohen të vijnë në lokal, e ka marrë ajo përsipër duke i kërkuar shumën e lekëve, e cila ishte 10,000 për doktoreshën dhe 5000 për infermierët dhe sanitarët që i hiqnin pampersin”. Kjo shumë vazhdonte çdo ditë dhe kanë qenë ditë të pakta që kallëzuesja ka dhënë vetëm 3000 lekë për infermierët dhe 5000 për doktoreshën, dhe përpos tyre, i jepte listën e ilaçeve që duhet të merrte nga jashtë. Kallëzuesja nuk e dinte a po ua jepnin ilaçet apo jo, sepse mamaja e saj i kishte thënë me mesazhe që nuk i japin asgjë nga ato që i sillnin ata. Shuma e paguar në total është rreth 800.000 lekë të rinj, pa llogaritur ilaçet që kallëzuesja, sipas instruktimit të Tire Alldervishit, i blinte nëpër farmaci të ndryshme për t’ia dhënë asaj me qëllim që të bëhej mjekimi i mamasë së saj. Komunikimet ndërmjet Tire Alldervishit dhe kallëzueses janë bërë si verbalisht, ashtu edhe nëpërmjet rrjetit të komunikimit “WhatsApp”. Është ndaluar shtetasja Tire Alldervishi dhe ndaj saj është depozituar kërkesa e Prokurorisë për vleftësimin e ndalimit dhe caktimin e masës së sigurisë “Arrest në burg”. Prokuroria pranë Gjykatës së Shkallës së Parë Tiranë do të kryejë një hetim të plotë dhe të thelluar për të qartësuar nëse ndodhemi para një rasti sporadik, apo para një skeme të mirëfilltë përfitimi nga personeli mjekësor apo ndihmës në kurriz të të sëmurëve me COVID-19, duke mos hezituar të vërë para përgjegjësisë penale këdo që do të rezultojë i implikuar.