Mediu prezanton 36 kandidatët për qarkun e Tiranës
Teksa e gjithë vëmendja është te zyrtarizmi i formulës së koalicionit të Partisë Demokratike me aleatët e saj, kryetari i Partisë Republikane, bashkëpunëtori tradicional i PD-së, prezantoi 36 kandidatët e PR-së. Në fjalën e tij në aktivin e PR-së Mediu u shpreh se pjesë e ekipit janë të rinjtë, si Blendi Sulaj dhe të tjerë që në këto 6 muaj sipas kreut të PR-së, kanë organizuar në mënyrë shembullore PR-në. Ndërkohë, Mediu çoi edhe mesazhe te kryedemokrati Basha. “E djathta duhet të bashkohet, por jo për të shërbyer si aneks apo qoshe rehatie për këdo politikan apo parti politike. E djathta duhet të bashkohet në radhë të parë në çdo qendër votimi, për të garantuar zgjedhje të lira dhe të ndershme. E djathta e ka të domosdoshme të ndërtojë në radhë të dytë një koalicion vlerash, ku idetë tona krijojnë shpresë dhe besim. Nuk është e mjaftueshme që të tregojmë vetëm se sa i keq është Edi Rama. Është e domosdoshme të tregojmë që ne kemi forcën për të bashkuar shqiptarët kudo që janë, për ta bërë Shqipërinë europiane, për të krijuar shanse dhe mundësi të reja”, tha Mediu. Ai u shpreh se i takon Partisë Demokratike që të paracaktojë dhe të tregojë se, cilat janë rrugët e fitores. “Ne duam të fitojmë me Partinë Demokratike dhe i takon Partisë Demokratike që të paracaktojë dhe të tregojë se, cilat janë rrugët e fitores dhe e vetmja rrugë, është rruga e ndershmërisë, për të pranuar se kush je dhe për të pranuar se me kë punon, për të ndërtuar një koalicion vlerash. E vetmja mënyrë për të ndërtuar një koalicion vlerash, elektorale dhe politike, është kur respekton dhe vlerëson peshën e çdo partie politike dhe në mënyrë të padiskutueshme, kur arrin dhe gjykon së bashku, kush janë kandidatët që përfaqësojnë këto vlera, për ta çuar jo thjesht opozitën përpara, por shoqërinë përpara, në mënyrë që në Parlament nesër, të jenë zëri i qytetarëve dhe i mundësisë për një realitet ndryshe, për të ndërtuar shtetin dhe jo vetëm thjesht të jenë në Parlament për t`i shërbyer pushtetit”, tha ndër të tjera Fatmir Mediu.