Teknologjia në zgjedhje, PS e PD nuk gjejnë dakordësi

Socialistët kërkojnë që testimi i votimit të bëhet vetëm në një ZAZ

Dy partitë e mëdha, Partia Demokratike dhe Partia Socialiste, nuk kanë gjetur dakordësinë për zonat se ku do të pilotohet votimin dhe numërimi elektronik. Gjatë takimit konsultativ të zhvilluar dje në Komisionin Qendror të Zgjedhjeve, palët nuk kanë gjetur një pikë të pranueshme se në cilat qarqe mund të aplikohet teknologjia në zgjedhje. Sipas Partisë Socialiste, testimi i votimit elektronik të mos bëhet për Tiranën, Fierin apo dhe Korçën, por të bëhen vetëm në një ZAZ, meqë procedura ka dhe kosto të larta. Sipas të majtëve, ky testim të bëhet ku të vendosë KQZ-ja. Ndërsa identifikimi biometrik do të varet nga “Smartmatic”, nëse kjo kompani i plotëson kushtet apo jo. Komisioni i Vlerësimit ende nuk e ka dhënë vendimin për “Smartmatic”, kompania e vetme që mund të realizojë identifikimin biometrik, kërkesë kjo e PD-së. Pas takimit me përfaqësuesit e partive politike, komisioneri shtetëror, Celibashi, në një postim në “Twitter”, shkruan se bashkëpunimi i KQZ-së me partitë politike është prioritet kryesor në funksion të mbarëvajtjes së përgatitjeve dhe administrimit të procesit zgjedhor. “Në takimin e punës që zhvilluam sot, diskutuam mbi projektet e identifikimit biometrik të zgjedhësve, votimit dhe numërimit elektronik, monitorimi me kamera i qendrave të votimit dhe votimi nga jashtë i shtetasve shqiptarë që kanë vendbanimin e përhershëm jashtë Shqipërisë. Bashkëpunimi i KQZ-së me partitë politike, prioritet kryesor në funksion të mbarëvajtjes së përgatitjeve dhe administrimit të procesit zgjedhor”, shkruan Celibashi. Ndërkohë, për votën e emigrantëve deri më tani alternativa e PSsë është që ajo të bëhet me postë dhe se emigrantët duhet të regjistrojnë fillimisht vendbanimin e tyre. Në mbledhjet e kaluara, KQZ-ja ka vendosur të ngrejë një sistem që do të mundësojë regjistrimin e shtetasve shqiptarë që jetojnë jashtë vendit për të votuar në zgjedhjet e 25 prillit. Nëpërmjet një projektvendimi që pritet të miratohet se shpejti, Komisioni Qendror i Zgjedhjeve kërkon që emigrantët të regjistrohen por fillimisht të deklarojnë vendbanimin e tyre, ashtu siç parashikon ligji i vitit 2016. Shtetasit shqiptarë që do duhet të japin votën për zgjedhjet parlamentare, do të plotësojnë të gjitha të dhënat që do të kërkojë sistemi i KQZ-së, i cili gjithashtu do të bëjë verifikimin e çdo shtetasi nëpërmjet dy mënyrave: mënyra e parë është të japë të dhënat personale edhe të familjareve, ndërsa mënyra e dytë, nëpërmjet FACE ID.