Dy biznesmenë përplasen për një ndërtim në Tiranë, njeri plagoset
U qëllua me armë Sino Llanaj, plumbi goditi edhe një kalimtar
Një sherr dhe më pas konflikt fizik mes dy pronarëve të një objekti në ndërtim në zonën e ish-parkut të autobusëve në Tiranë ka përfunduar me plagosjen me armë zjarri të biznesmenit 42-vjeçar Sino Llanaj.
Sipas “News 24”, sherri ndodhi mes Sino Llanaj dhe Albert Allmuçës. Nga përdorimi i armës mbeti i plagosur biznesmeni Llanaj, si dhe një kalimtar i rastit, shtetasi Klodian Komino, të cilin një plumb rikoshetë e ka kapur në kofshë. Mësohet se i lënduari ndodhet jashtë rrezikut për jetën. Por gjatë sherrit, ka mbetur i plagosur me sende të forta edhe roja i objektit, Shkëlzen Biberi. Dy pronarët Llanaj dhe Allmuça kishin rënë dakord për ndërtimin e objektit brenda vitit 2019, por kontrata mes tyre ishte prishur dhe objekti nuk është ndërtuar, duke sjellë probleme jo vetëm mes dy biznesmenëve, por edhe me banorët, që vijojnë të jetojnë me qira. Mësohet se edhe 5 ditë më parë ka pasur një konflikt fizik mes tyre dhe banorëve, të cilët kërkojnë ndërtimin e pallatit sipas kontratës. Ditën e djeshme ka qenë biznesmeni Sino Llanaj fillimisht në objekt, bashkë me disa shoqërues dhe më pas ka shkuar edhe pronari Allmuça, edhe ai me disa persona të tjerë. Pas konfrontimit fizik, ka pasur të shtëna nga grupi Allmuça, ku është plagosur biznesmeni Llanaj dhe kalimtari. Policia ka identifikuar personin që ka qëlluar me armë. Në dëshminë e parë pas plagosjes, Sino Llanaj ka thënë se autor është shtetasi Albert Allmuça.
VETEDOREZIMI Pas plagosjes me armë zjarri të Sinan Llanajt, është dorëzuar në Policinë e Tiranës biznesmeni Albert Allmuça. “News 24” raporton se biznesmeni Allmuça është paraqitur në Komisariat pas ngjarjes dhe ka thënë se nuk ka qenë i pranishëm, në momentin kur është plagosur Llanaj. Nga ana e tij, 42-vjeçari i plagosur me dy plumba në këmbë i ka thënë Policisë se autori i plagosjes është pikërisht Allmuça. Ndërkohë, në një njoftim zyrtar të Policisë së Tiranës, të shpërndarë për mediat ditën e diel, thuhej se: “Nga specialistët për Hetimin e Krimit në Komisariatin e Policisë Nr.2, u bë arrestimi në flagrancë i shtetasit A.L., 27 vjeç, si dhe u proceduan në gjendje të lirë shtetasit V.Gj. dhe S.M., dhe punohet për kapjen e shtetasve të shpallur në kërkim A.B. dhe E.F., pasi ditën e djeshme (e shtunë), në rrugën ‘Ndre Mjeda’, në bashkëpunim me njëri-tjetrin, kanë goditur me sende të forta shtetasin S.Ll., i cili ndodhet në spital nën kujdesin e mjekëve”.