Pence refuzon aktivizimin e Amendamentit 25
Për herë të parë në histori një President amerikan fajësohet dy herë
Zëvendëspresidenti Mike Pence ka refuzuar të përdorë Amendamentin 25 për të shkarkuar nga detyra si të paaftë Presidentin e SHBA-së, Donald Trump, në ditët e fundit të detyrës së tij. Përpara votimit të rezolutës nga demokratët, Pence i dërgoi një letër kryetares së Dhomës së Përfaqësuesve, Nancy Pelosi, duke shpjeguar se ai nuk do të merrte veprime bazuar në Amendamentin e 25-të të Kushtetutës së SHBA, sipas të cilit nënpresidenti dhe shumica e anëtarëve të kabinetit deklarojnë një President të paaftë duke e shkarkuar atë nga detyra. Pas kësaj, Dhoma e Përfaqësuesve e Kongresit amerikan pritet të miratojë ngritjen zyrtarisht të akuzave për shkarkimin e Presidentit Donald Trump, pasi demokratët kanë shumicën në Dhomën e Përfaqësuesve, por edhe gjashtë republikanë kanë sinjalizuar mbështetjen e kësaj mase. Edhe pse mandati katërvjeçar i Presidentit Trump skadon në mesditën e 20 janarit, projektrezoluta me katër faqe e Dhomës së Përfaqësuesve propozon ngritjen e akuzave për shkarkim duke theksuar se Presidenti Trump ka "demonstruar se ai do të mbetet një kërcënim për sigurinë kombëtare, demokracinë dhe Kushtetutën, nëse lejohet të vazhdojë detyrën dhe ka vepruar në kundërshtim të fortë ndaj vetëqeverisjes dhe sundimit të ligjit". Projektrezoluta citon akuzat e pabazuara të Trump se ai humbi zgjedhjet për shkak të manipulimit të votave dhe parregullsive gjatë numërimit të votave, presionin i tij mbi zyrtarët e zgjedhjeve në shtetin jugor të Xhorxhias për t'i "gjetur" atij më shumë se 11,000 vota për të përmbysur fitoren e Biden në këtë shtet dhe thirrjet drejtuar mbështetësve të tij në një tubim të mërkurën e kaluar që të marshonin drejt Kapitolit për të bërë presion ndaj ligjvënësve për të përmbysur rezultatin e zgjedhjeve. 218 ligjvënës demokratë e kanë nënshkruar projektrezolutën, duke siguruar një shumicë në Dhomën e Përfaqësuesve me 435 anëtarë me ose pa mbështetjen e republikanëve kundër Presidentit republikan në largim. Do të ishte hera e parë në historinë amerikane që ndaj një Presidenti ngrihen dy herë akuza për shkarkim gjatë mandatit të tij. Ndërsa republikanët votuan në bllok kundër ngritjes së akuzave për shkarkimin e Trump vitin e kaluar, nën akuzën për presion ndaj Ukrainës për të hetuar demokratin Joe Biden, tashmë President i zgjedhur, udhëheqësit republikanë të Dhomës së Përfaqësuesve po tregojnë se nuk kanë ndërmend t'u bëjnë presion anëtarëve të tyre për të votuar këtë herë kundër përpjekjeve për shkarkim. Nëse Dhoma e Përfaqësuesve merr vendim për t'i ngritur zyrtarisht akuzat, çështja kalon për gjykim në Senat. Nuk është e qartë nëse udhëheqësit e Dhomës së Përfaqësuesve do t'i dërgojnë menjëherë akuzat për shqyrtim në Senat, duke pasur parasysh që mandati i Trump përfundon javën e ardhshme. Edhe nëse Trump do të largohej nga detyra, një vendim i Senatit pro akuzave pas përfundimit të mandatit do ta ndalonte atë të kandidonte për një post zyrtar në qeverinë federale në të ardhmen.