Kapacitetet frigoriferike për vaksinat, Rama e Manastirliu thonë shifrat

Kryeministri Edi Rama vendosi dje të japë një tjetër dëshmi për të bindur konspiracionistët e vaksinës. Ashtu siç premtoi ditën që u injektua doza e çmuar, një ditë më parë, bashkë me ministren e Shëndetësisë, Ogerta Manastirliun, sollën me kamera frigoriferët ku do të ruhen qindra mijëra dozat që pritet të vijnë, si dhe ato ku ruhen aktualisht vaksinat e para. Me gjuhën e shifrave, shefi i qeverisë dhe nr. 1 i shëndetësisë u përpoqën të përçonin mesazhin se “PO”, Shqipëria i ka kapacitetet e duhura për të ruajtur vaksinat dhe mbetet vetëm që ato të vijnë. “Jemi në Depon Farmaceutike të QSUT-së, ku tashmë janë instaluar edhe frigoriferët -70°C që i kemi pasur, i kemi koaliduar dhe janë gati për të pritur serinë e vaksinave. Aktualisht vaksinat e ‘Pfizer’ që kemi janë në Institutin e Shëndetit Publik. Edhe aty ruhen në kushte të standardeve ultra të ftohta -70°C deri në -80°C. Në tërësinë e këtyre kapaciteteve, kapacitetet aktuale për temperaturën -70°C janë për 250 mijë doza vaksine, në mënyrë të menjëhershme, për vaksinën e ‘Pfizer’”, u shpreh Manastirliu. Ndërkohë, Rama bëri me dije se shumë shpejt do të nisë puna që laboratorët dhe frigoriferët për ruajtjen e vaksinave do të nxirren në një godinë të veçantë. Për këtë, ministrja Manastirliu tha se projekti është gati. Sot është dita e katërt e vaksinimit kundër Covid-19 në Shqipëri. Procesi kryhet në bazë të një procedure strikte, pasi dozat duhet të përdoren brenda një kohe të caktuar. “Jemi përpjekur që çdo dozë ta përdorim brenda orarit që ajo ka, sepse kur hollohet mund ta përdorësh brenda 5 orësh në temperaturë frigoriferike dhe dy orë në temperaturë ambienti”, saktësoi shefja e Epidemiologjisë në ISHP, Silva Bino.