Licencat, 784 infermierët e rinj që futen në provim
Nga 22-29 janar, kandidatët që testohen për të ushtruar profesionin
Dalin emrat e kandidatëve për mjekë që i nënshtrohen provimit të shtetit për të marrë licencën e ushtrimit të profesionit.
Sezoni XIX i provimeve për bluzat e bardha mbyllet me infermierët dhe teknikët e laboratorit, emrat e të cilëve botohen sot në gazetë. Për të shmangur grumbullimet, provimet e shtetit do të zhvillohen sipas një kalendari me data dhe orare të përcaktuara jo vetëm sipas specialitetit, por edhe për secilin kandidat që plotëson kushtet për të hyrë në këtë provim. Referuar këtij kushti duhet të tregoheni të kujdesshëm dhe të shihni me vëmendje datën dhe orarin se kur duhet të paraqiteni për të dhënë provimin, pasi në të kundërt duhet të prisni disa muaj deri sa të hyni sërish në testin e licencës, deri në këtë kohë nuk mund të aplikoni për vendet e lira të punës, si në strukturat publike mjekësore, ashtu edhe në ato private. Një tjetër këshillë tek e cila ekspertët e QSHA-së vënë theksin, është edhe dosja e dokumenteve që duhet të keni me vete në ditën e testimit. Në mungesë të njërit prej dokumenteve, nuk do të lejoheni që të hyni në ambientet e testimit. Kandidatët që testohen për herë të parë gjatë këtij sezoni do të shlyejnë një tarifë prej 10 mijë lekësh. Për çdo herë që rezultojnë mbetës, tarifa pëson rritje progresive me 2500 lekë, në varësi të herës së testimit. Ndryshe nga më parë, tanimë janë të pafundme mundësitë për t’u futur në provim shteti dhe jo vetëm pesë. I vetmi penalizim është se kandidatët që nuk arrijnë të sigurojnë në testimin alternativa as 50 pikë, nuk do të pajisen me licencën profilit në të cilën aplikojnë, pasi rezultojnë mbetës. Vetëm pasi të marrin testin e licencës, këta profesionistë të shëndetit do mund të aplikojnë për të fituar një kontratë pune.