Tri vite pas ligjit, Rama shpall dëshmorë 4 viktimat e “21 janarit” para zgjedhjeve
Kryeministri: Një pjesë e tyre që gjykuan çështjen nuk janë më në sistemin e drejtësisë. Janë larguar nga sistemi si pjesë e llumit
Në dhjetor të vitit 2018 parlamenti miratoi ndryshimet në ligjin për “Dëshmorët e Atdheut”, ku një prej ndryshimeve ishte edhe kategorizimi “Dëshmor i Atdheut” i personave që vriten në protesta paqësore.
Pas tri viteve nga ndryshimi i ligjit, në prag të zgjedhjeve parlamentare, Kryeministri Rama shpalli “Dëshmorë të Atdheut” 4 viktimat e protestës së 21 janarit 2011. “Sot bëhen plot 10 vjet nga tragjedia e ‘21 janarit’ dhe në këtë 10-vjetor qeveria e Republikës së Shqipërisë ka vendosur të japë titullin e lartë të ‘Dëshmorit të Atdheut’ për të katër dëshmorët e protestës paqësore të ‘21 janarit’. Njëkohësisht, sot është dita për të bërë një reflektim pas këtij rrugëtimi dhjetëvjeçar në përpjekjen për të kuptuar bashkërisht se si ajo ngjarje tragjike dhe katër jetë të pafajshme të humbura kanë ndikuar historinë tonë të re në dy drejtime themelore. Nga njëra anë, në drejtim të marrëdhënies së qeverisë me protestën dhe nga ana tjetër në drejtim të transformimit të sistemit të drejtësisë”, tha Kryeministri. Në vijim të fjalës së tij kreu i PS-së Edi Rama u shpreh se ngjarja e 10 viteve më parë ka shërbyer si reflektim për sjelljen e shtetit karshi protestuesve. Në një mandat të dytë qeverisës me dhjetëra protesta të mëdha, Kryeministri Rama tha se Policia ka vepruar në mënyrë proporcionale, por ka garantuar jetën e qytetarëve. “Unë jam sinqerisht krenar që ne si pjesë e asaj përpjekjeje në një kohë tjetër dhe në një kohë tejet të vështirë e të ngatërruar me marrjen e përgjegjësisë së madhe të qeverisjes së vendit kemi qenë mishërimi i një vullneti të palëkundur për të garantuar për të gjithë dhe gjithmonë, lirinë dhe të drejtën për të protestuar dhe në situata shumë herë më dramatike nga pikëpamja e kërcënimit të fuqisë së protestës në tejkalim të të gjithë asaj kornize që përcakton Kushtetuta dhe ligji për të drejtën për të protestuar, kemi garantuar një reagim proporcional duke siguruar në çdo rast që në radhë të parë, jeta e protestuesit të mos vihet në pikëpyetje dhe dinjiteti i protestës që është dinjiteti i shoqërisë, të mos shkelet në emër të mbrojtjes së gardhit, apo në emër të mbrojtjes së hapësirës tej gardhit, pavarësisht ekseseve të përsëritura, me të cilat e gjithë shoqëria është përballur drejtpërdrejtë, duke ndjekur zhvillimin e protestave”, tha Rama AKUZAT NDAJ
DREJTËSISË Kur kanë kaluar 10 vite nga protesta e “21 janarit”, Kryeministri Edi Rama thotë se drejtësia për këtë çështje nuk ka shkuar ende në vend. Rama bën përgjegjës prokurorët dhe gjykatësit dhe për të konfirmuar akuzën e tij ndaj tyre ai përmend faktin se një pjesë e juristëve që gjykuan çështjen e “21 janarit” janë shkarkuar nga vetingu. “Nëse do të lexojmë dosjen e gjykimit për dy persona të akuzuar për ‘21 janarin’, po të mos e dish që kjo është një ngjarje që ka ndodhur, kjo është një dosje e një procesi për një ngjarje të ndodhur, me siguri mund të mendosh që në fakt këto janë faqe të një libri satirik. Dy persona të evidentuar si persona që kanë qëlluar, si persona që kanë vrarë, konsiderohen nga Gjykata si dy individë që nuk kanë bashkëpunuar me njëri-tjetrin, nuk e njihnin asnjërin prej viktimave dhe nuk kanë pasur bashkëpunim me persona të tretë dhe faktikisht, e thotë Gjykata e Apelit, nuk e them unë. Nuk e thotë me fjalë, me shkrim, që këta persona nuk kanë dashur të vrasin, por nga vetëbesimi i tepruar, kanë krijuar viktima. Njësoj si terroristët që nuk njohin viktimat kur vënë një bombë në një stacion”, tha Rama.
MESAZHI Teksa Policia e kryeqytetit ka kërkuar në Prokurori që të rihapet dosja e “21 janarit”, Kryeministri Edi Rama në fjalën e tij para familjarëve të viktimave kujtoi fatin e disa prej atyre që gjykuan herën e parë të kësaj dosje. “Ku janë sot ata, të cilët duke përdorur çekiçin e gjykatësit të Republikës së Shqipërisë e sakatuan përmes seancash gjyqësore absurde, të drejtën e të gjithë familjarëve dhe të gjithë shoqërisë për të parë drejtësi për ‘21 janarin’. Një pjesë e tyre nuk janë më në sistemin e drejtësisë. Janë larguar nga sistemi si pjesë e llumit që vazhdon të pastrohet në këtë sistem. Një pjesë tjetër janë larguar, duke dhënë dorëheqjen, të vetëdijshëm që si pjesë e llumit, nuk mund ta kalonin filtrin e pastrimit të sistemit dhe një pjesë tjetër janë akoma në punë, pasi ende nuk i ka ardhur radha për të kaluar në filtrin e vetingut, duke qenë se janë në nivelin e shkallës së parë”, tha Kryeministri