Komiteti nuk tërhiqet, universitetet do të vijojnë mësimin online
Ministrja Kushi: Do kërkoja mirëkuptimin dhe solidaritetin e gjithë studentëve
Universitetet do të vijojnë të qëndrojnë të kyçura me urdhër të Komitetit të Ekspertëve.
Ky është vendimi më i fundit i Komitetit të Ekspertëve, i komunikuar në dëgjesën e kërkuan nga ministrja e Arsimit. Evis Kushi kërkoi takim me ekspertët “për të sqaruar situatën më të fundit dhe për t’u dhënë gjithashtu një përgjigje institucioneve tona të arsimit të lartë, universiteteve; dhe më e rëndësishmja, studentëve tanë, të cilët janë në fokusin tonë primar për t’iu siguruar arsim sa më cilësor, sidomos sa më optimal tani në kushte pandemie”. Por përgjigjja e komitetit ishte sërish negative. Nuk do të ketë mësim në auditorë. E gjendur përballë këtij vendimi, ministrja kërkoi vetëm mirëkuptimin e studentëve.
KËRKESA E KUSHIT PËR TAKIM “Jo më larg se para 3 ditësh, pranë ambienteve të Ministrisë së Arsimit, Sportit dhe Rinisë, zhvilluam një takim me rektorët e universiteteve publike në vend për të diskutuar rreth ecurisë së deritanishme të vitit akademik, mësimit ‘online’, nevojat e shfaqura dhe problematikat e përgjithshme që janë shqetësim i të gjithëve për shkak të efekteve të drejtpërdrejta që ka sjellë kjo kohë e paprecedent. Bashkohem plotësisht me çdo mendim, opinion, rrethanë e shqetësim të tyrin, sikurse do të dëshiroja të kemi edhe mirëkuptimin e tyre dhe çdo institucioni të arsimit të lartë ndaj çdo vendimi që rrjedh si rezultat i rekomandimeve të qenësishme, analitike e shkencore pikërisht nga ekspertiza me vlerë e Komitetit të Ekspertëve. E po ashtu, këtë mirëkuptim dhe solidaritet në një kohë aspak të lehtë, ku vëmendja maksimale dhe parësore e qeverisë shqiptare është mbrojtja e shëndetit e qytetarëve shqiptarë sikurse në çdo vend të globit - e kërkoj me shumë përulësi edhe nga ana e çdo studenti që kërkon rikthimin në auditorë. Gjatë këtyre ditëve kam pasur pa fund mesazhe, kërkesa, ankesa në lidhje me hapjen e auditorëve. I mirëkuptoj që të gjitha, sepse e njoh shumë mirë rëndësinë e të qenit në auditor, e kuptoj shumë mirë marrëdhënien pedagog-student, dhe padyshim vlerësoj shumë mirë edhe sfidat që krijon zhvillimi i mësimit ‘online’. Prandaj, duke qenë në mënyre të pandalshme pranë zërit të studentëve e pedagogëve, dhe njëkohësisht autoriteti institucional si pikë referimi për universitetet për rritjen dhe përmirësimin e cilësisë së arsimit të lartë, e ndjeva të nevojshme të përcjell pranë këtij komiteti anëtarësh fort të nderuar edhe shqetësimin e krijuar kohët e fundit për pamundësinë e hapjes së auditorëve nëpër universitete. Ashtu siç e kam deklaruar edhe me përpara, ministria që drejtoj ndjek shumë nga afër edhe praktikat më të mira të ndërmarra në vendet më të zhvilluara të botës. Situata nuk ndryshon nga këtu. Dominon zhvillimi i mësimit ‘online’ dhe respektohen vendimet që pasojnë rekomandimet e autoriteteve eksperte që vlerësojnë rigorozisht dinamikën e pandemisë. Edhe në vendin tonë, si MASR, jemi plotësisht të vetëdijshëm se sa e rëndësishme është pesha rekomanduese dhe ekspertiza e Komitetit të Ekspertëve. Prandaj, me shumë mirënjohje për punën tuaj të palodhur dhe sakrificat që po bëni pa u ndalur që nga dita e parë e pandemisë, do të dëshiroja që ky Komitet i nderuar të ndante me ne vlerësimet më të fundit dhe opinionet e tij rreth çështjes së mësimit ‘online’ nëpër universitete”.
PËRGJIGJJA Njëri pas tjetrit, anëtarët e Komitetit të Ekspertëve dhanë argumentet e tyre për të mos ndryshuar vendimin për universitetet. “Pas diskutimeve të shumta, vendosëm ta vazhdojmë edhe pak këtë, pasi është në të mirë të shëndetit të vetë studentëve dhe të shëndetit publik. Nuk është vendim i marrë vetëm në Shqipëri, por edhe në shumë vende të botës. Krahas masave për të vazhduar orën policore dhe ndërprerjen e fluturimeve direkte me Britaninë e Madhe. Qëndrimi në konvikte e shton shumë rrezikun e infeksionit dhe mundet që konviktet të shndërrohen në vatra të sëmundjes. Tirana ka numrin më të lartë të infeksioneve dhe shumica e universiteteve janë të përqendruar në Tiranë. Ardhja e studentëve dhe qëndrimi i tyre në konvikte dhe pastaj shkuarja në shtëpitë e tyre nëpër qytete të ndryshme bën që të shpërndahet infeksioni edhe në ato qytete ku ne tani e kemi të kontrolluar”, tha kryetarja e Komitetit Teknik të Ekspertëve, Mira Rakacolli. Edhe për shefen e shërbimit të sëmundjeve infektive në ISHP, Silva Binon, vendimi konsiderohet me rëndësi për shkak se moshat e reja mbeten transmetuesit kryesorë të infeksionit. “E kuptoj shumë mirë shqetësimin tuaj. I dimë sfidat e mësimit online. Me shfaqjen e varianteve të reja, qoftë në Mbretërinë e Bashkuar apo në vende të tjera të botës, Afrikën e Jugut apo SHBA është vënë re se mosha 15-24 vjeç, jo vetëm preken, por shërbejnë si transmetues në moshat e tjera. Është një vendim jo i dëshirueshëm, por mbi këto fakte është një vendim që duhet marrë për një kohë të caktuar. Të shpresojmë se vaksinimi i popullatës do të na sjellë vërtet buzëqeshjen”, tha Bino. Aktualisht situata në spitalet COVID paraqitet e qëndrueshme, por sipas shefes së infektivit, Najada Çomos, në harkun kohor 11mujor, në spitalet Covid janë shtruar rreth katër mijë pacientë. Zhvillimi i mësimit në rrugë normale, vuri në dukje doktoresha, do të ishte diçka e mirë për mësimin, por së pari është shëndeti i popullatës. “Më mirë të kesh auditorë bosh sot dhe spitale bosh nesër, sesa auditorë plot sot dhe spitale të tejmbushura nesër me pacientë me Covid, prej të cilëve ju e dini që ka dhe humbje jete”.
VENDIMI Kushi garantoi se Ministria e Arsimit, Sportit dhe Rinisë padyshim që do të jetë në respekt të sugjerimeve të komitetit. “Ne nuk mund të marrim asnjë vendim dhe jemi shumë të ndërgjegjshëm për këtë, nuk mund të marrim asnjë vendim që shkon kundër analizave tuaja shkencore, argumentet që na dhatë janë të qarta, prioriteti më madhor është shëndeti. Do të kërkoja mirëkuptimin dhe solidaritetin e të gjithë studentëve”.