Rekordmeni CR7, pas Superkupës kërkon poltronën e Pelesë
“Peshkaqeni” i trofeve, 9 realizime në 10 finale
Kristiano Ronaldo është shndërruar tashmë në sinonim të golave, por edhe të trofeve.
Kundër Napolit, në finalen e Superkupës së Italisë, portugezi zhbllokoi takimin dhe në fund të tij ngriti në qiell trofeun e 33-të në karrierë. Madje, mbrëmja e së mërkurës përkoi edhe me një shifër stratosferike: 760 realizime në karrierën mes klubeve dhe kombëtaren e parë, e cila e bën yllin e Juventusit një "peshkaqen" të zonave të rreptësisë, një bishë të tërbuar që kur ndjen erën e gjakut është i pamëshirshëm. Të gjitha këto epitete, ndonëse disi të forta, apo ndoshta edhe të frikshme gjejnë vend kur analizon ato që CR7 ka bërë së fundmi, ndonëse më datë 5 shkurt, në kartën e tij të identitetit do të lexohet 36 vjeç. Por cilat janë numrat e frikshëm? Pikësëpari 17 gola në finalet që ai ka mundur të luajë, ndërsa në 10 të fundit radhazi ai ka lënë vulën personale duke realizuar 9 gola. Sikur të mos mjaftonte kjo, ky sezon i tretë me Juventusin ka edhe një tjetër mesatare mahnitëse, duke qenë se në 32 ndeshjet e fundit ka realizuar 32 gola. Dhe me 1 gol mesatarisht për ndeshje, por aq sa çka qenë edhe mesatarja e tij më e mirë në karrierë, kur vishte bluzën e Realit të Madridit, pa dyshim që fjalët e tij të pas ndeshjes duhen besuar: "E dimë që Milani dhe Interi janë të fortë, por ne nuk jemi dorëzuar ende dhe duam edhe titullin kampion, pavarësisht diferencës aktuale në renditje". Por ndërsa të gjithë presim të shohim nëse kjo deklaratë e Ronaldos do të rezultojë e vërtetë, me 760 golat që ai tashmë numëron zyrtarisht në karrierë, do të jetë shumë më i karikuar në pritje të ndeshjes me Bolonjën, të dielën në orën 12:30, në "Allianz Stadium". Në rast të një goli të radhës në Serinë A, sulmuesi iberikas do të ulet në poltronën e legjendës braziliane
Pele, të cili zyrtarisht nga UEFA dhe FIFA i njihen 761 gola, goleadori i tretë më i mirë i historisë së futbollit. Dhe vetëm pasi të bëjë realitet këtë do të vazhdojë sprintin për të kapur Romarion në vendin e dytë me 772 dhe në fundi, Jozef Biçanin me 805 golat e tij.