Legalizimet, kushtet e reja për të marrë tapinë

Kadastra lehtëson procedurat për marrjen e certifikatës së pronësisë. Gazeta zbardh kushtet e reja dhe katoritë që përfitojnë nga vendimi i ri. Afatet dhe kriteret që duhen plotësuar

Ndryshojnë kriteret për legalizimin e ndërtimeve pa leje, duke iu dhënë mundësinë mbi 90 mijë familjeve që u penalizuan në fazën e parë që të bëhen pjesë e procesit.

Përmes vendimit “Për përcaktimin e rregullave të zbatimit të kritereve të legalizimit dhe miratimin e modelit të aktit të legalizimit për ndërtimet pa leje” Agjencia e Kadastrës ka hapur një shteg të ri për këto objekte, duke lehtësuar kriteret e kualifikimit. “Aktet e përjashtimit nga legalizimi të miratuara përpara hyrjes në fuqi të këtij vendimi rishikohen sipas kreut IV, të pjesës së gjashtë të Kodit të Procedurave Administrative, në 12 përputhje me kriteret e përcaktuara në nenin 18, të ligjit nr. 20/2020 “Për përfundimin e proceseve kalimtare të pronësisë në Republikën e Shqipërisë”, dhe në këtë vendim, nëse këto të fundit ose ndryshimi i rrethanave të faktit mundësojnë kualifikimin e ndërtimeve për legalizim”, thuhet në vendim. Janë mbi 90 mijë familje të cilat u skualifikuan në fazën e parë, pjesa më e madhe prej tyre në Tiranë. Me anë të këtij vendimi, dosja e tyre do të mund të rivlerësohet nga e para. Dhe nëse do të ketë sërish familje të cilat nuk do ta kalojnë as këtë prag, atëherë ligji i miratuar në maj të 2020ës “Për përfundimin e proceseve kalimtare të pronësisë” përcakton që këto familje të kompensohen mbi bazën e kostos së ndërtimit. Varianti tjetër që parashtrohet është përfshirja e tyre në programet e strehimit. Në ndryshimet ligjore janë përcaktuar edhe afate konkrete për përmbylljen e procedurave të legalizimit. Kështu, do të duhen vetëm dy muaj për t’u pajisur me certifikatë pronësie dhe nëse do të ketë nga ata që duan ta mbyllin këtë praktikë më shpejt, mund ta bëjnë këtë përkundrejt një tarife shtesë. Vendosja e këtyre afateve është një lajm i mirë edhe për ato familje të cilat e kanë marrë lejen por jo certifikatën e pronësisë, pra pasuritë e tyre nuk janë regjistruar. “Në rastet e procedurës së përshpejtuar, sipas kërkesës së subjektit, drejtoria vendore është e detyruar të përmbyllë të gjithë procedurën administrative, përfshirë evidentimin në terren dhe vendimmarrjen brenda 30 ditësh nga data e depozitimit të kërkesës dhe pagesa e tarifës së shërbimit shtesë”, thuhet në pikën 22 të vendimit, ku bëhen me dije po ashtu edhe dokumentet që duhet të dorëzohen. “Akt-ekspertiza,

deklarata noteriale, deklarata për funksionin e ndërtimit të papërfunduar dhe deklarata për shembjen e objektit, kur janë të nevojshme, sipas ligjit dhe këtij vendimi, nuk përbëjnë kusht të domosdoshëm për përfundimin e procedurës administrative. Barrën procedurale për depozitimin e tyre e ka vetë poseduesi i ndërtimit dhe drejtoria vendore njofton brenda 5 ditësh nga data e evidentimit në terren poseduesin për të dorëzuar këto akte, nëse janë të nevojshme”. Sa i takon sipërfaqes për të cilën do të bëhet kalimi i pronësisë, ajo mbetet siç ka qenë. Për qytetarët do të jetë sa trefishi i bazës së ndërtimit dhe jo më shumë se 500 m², ndërsa për bizneset vetëm trefishi i bazës së ndërtimit. Çmimet llogariten mbi vlerën e truallit sot në treg. “Kur për shkak të përmasave ose planvendosjes së parcelës ndërtimore krijohen sipërfaqe të lira, që nuk mund të shfrytëzohen më vete për ndërtim, ato i kalohen në pronësi poseduesit të ndërtimit pa leje, sipas çmimit të përcaktuar në hartën e vlerës së pronës, të miratuar me vendim të Këshillit të Ministrave”, theksohet në ligj.