Familjarët e viktimave të ‘21 janarit’: Presim nga drejtësia e re
Xhaxhai i Aleks Nikës kritikon togat e zeza: Të inkriminuar
Familjarët e 4 të vrarëve të 21 janarit, të nderuar me titullin e lartë “Dëshmorë të Atdheut”, morën pjesë në homazhet përkujtimore në nderim të tyre. 10 vjet pas ngjarjes së rëndë ata përsëritën ritin e vendosjes së luleve në bulevardin “Dëshmorët e Kombit”, si dhe kërkuan edhe një herë drejtësi për gjakun e familjarëve të tyre të vrarë në protestën para Kryeministrisë më 21 janar 2011. Familjarët e kanë mirëpritur vendimin e qeverisë për nderimin e tyre me titullin e lartë “Dëshmor i Atdheut”, por shprehen se drejtësia për vrasjen e të afërmve të tyre ka munguar dhe kanë shpresë që ajo një ditë do të vijë. Mark Nika, xhaxhai i të ndjerit Aleks Nika, vrasja e të cilit vazhdon të mbetet pa autor, ende shpreson te drejtësia, por më parë dëshiron që nga sistemi të largohen të inkriminuarit. “Ne s’kemi kërkuar drejtësi nga Kryeministri, as nga qeveria. Drejtësinë e kërkojmë nga drejtësia shqiptare, e cila është në reformim e sipër dhe pa u reformuar plotësisht drejtësia, nuk do të ketë drejtësi për ne. Pa u larguar edhe ato që janë të inkriminuarit, sepse ata mbrojnë veten, mbrojnë ata që i kanë emëruar në sistemin e drejtësisë”, tha Mark Nika. Edhe mbesa e Ziver Veizit ka kërkuar dje drejtësi për vrasjen e xhaxhait të saj, duke thënë se shpresa vdes e fundit. “Kanë kaluar 10 vite. Prisnim drejtësi, por ende nuk është vendosur në vend. Shpresa gjithmonë vdes e fundit. Ne shpresojmë që drejtësia të bëjë punë e vet. E vlerësojmë kryetarin e Këshillit të Qarkut për vlerësimin me titull të xhaxhait tonë. Ne shpresojmë që drejtësia të vihet në vend. Vrasësi i xhaxhait tonë të marrë dënimin e merituar”, tha ajo. Policia ka kërkuar rihetim të dosjes për vrasjen e 4 protestuesve Aleks Nika, Ziver Veizi, Hekuran Deda dhe Faik Myrtaj, para Kryeministrisë në protestën e opozitës, dy prej të cilave kanë mbetur pa autor.