Koha që PD të zbresë në 25 prill me programin dhe ekipin e fitores

Jemi 90 ditë para zgjedhjeve politike të 25 prillit, zgjedhjet më të rëndësishme këto që pas atyre të 22 marsit 1992. Me shumë gjasa, gjatë këtij viti do të kemi edhe përsëritjen e zgjedhjeve vendore, pasi më 30 qershor 2019 nuk kishte zgjedhje as zgjidhje, por kishte thjesht vjedhje dhe manipulime nëpërmjet votimeve moniste të partisë-shtet. Garancinë për zgjedhjet vendore e jep Gjykata Kushtetuese e krijuar tashmë, e cila po fillon funksionimin dhe një ndër vendimet e para të saj do të jetë edhe vendimi për përsëritjen e zgjedhjeve vendore, pasi kryetarët aktualë të bashkive dhe anëtarët e këshillave bashkiake janë të jashtëligjshëm, pasi janë në shkelje flagrante të kushtetutës. Qeverisja e Edi Ramës dhe sekti i tij kriminal me emrin rilindje i kanë bërë aq dëm këtij vendi, sa nuk do t’ia kishin bërë as serbët e mikut të tij, Aleksandër Vuçiç, po ta kishin menaxhuar ata Shqipërinë, financat dhe pasuritë tona publike. Edi Rama dhe qeverisja e tij kanë shkatërruar sistemin politik (jemi në monizëm dhe jo në pluralizëm politik funksional), sistemin ekonomik (nuk kemi asnjë element të ekonomisë së tregut, sipërmarrjes së lirë dhe të konkurrencës, përkundrazi ekonomia është e formës monopol-oligopol dhe që nuk i shërben aspak popullit, por vetëm disa oligarkëve mafiozë), sistemin e drejtësisë (drejtësia është e kapur nga krimi, korrupsioni dhe nën thundrën e ‘vetingut’ politik të rilindjes), median (është komplet e shantazhuar, kontrolluar dhe korruptuar nga pushteti i parave të pista dhe nën influencën e politikës së qeverisë). Ekzekutivi është kokë e këmbë i korruptuar, ndërkohë që nuk ka asnjë lloj ndarjeje dhe balancimi të pushteteve, qeverisja është komplet e pakontrolluar nga askush dhe një partisekt-shtet kontrollon 100 % të pushteteve. Qeverisja aktuale është qeverisja më antieuropiane, më antipopullore, më antikombëtare, më e korruptuar dhe më e paafta që nga viti 1990. Skandalet e kësaj qeverisje janë të panumërta dhe të përditshme, dhe sot këtë e dinë fatmirësisht jo vetëm shqiptarët, por edhe ndërkombëtarët. Në kohën kur vendi mbytet nga përmbytjet, ministrat “sheikë” bredhin restoranteve më të shtrenjta në botë dhe nuk mjafton me kaq, por vetëm gënjejnë dhe mashtrojnë për gjithçka bashkë me Kryeministrin. Kryeministri fut “kontrabandë” rreth 950 vaksina, duke gënjyer dhe mashtruar shqiptarët, ndërkohë që sasitë e tjera nuk dihet se kur do vijnë, pasi edhe janari iku pa vaksina. Autoritetet italiane të drejtësisë kanë kapur në përgjime organizatën mafiozë “Ndragheta”, duke bërë pazare të pista me qeveritarë të rilindjes për të përfituar tendera apo leje ndërtimi në Tiranë, kundrejt ryshfetit 20% për ministra dhe kryebashkiakun e Tiranës. Për këtë megaskandal, SPAK duhet të fillojë urgjentisht hetimin dhe jo të fshehë kokën si struci në rërë. Në këto kushte kur qeverisja është totalisht e degraduar, e zhytur në krim, korrupsion, paaftësi, injorancë si dhe tribalizëm politik dhe krahinor, dhe oferta e rilindjes “Shqipëria që duan hajdutët e rilindjes” do të jetë edhe motoja e tyre për zgjedhjet e 25 prillit, por edhe “epitafi” pas 25 prillit, fitorja e opozitës dhe “NDRYSHIMI I MADH” bëhet një domosdoshmëri mbarëkombëtare. Shqiptarët nuk kanë më asnjë iluzion dhe nuk presin më asgjë nga banda qeverisëse, e cila do të shkërmoqet më 25 prill dhe do të përballet me drejtësinë pas 25 prillit. Në këto kushte, kur vendi nuk ka qeverisje as qendrore dhe as lokale, por thjesht banda hajdutësh qendrorë dhe lokalë, qytetarët na kërkojnë çdo ditë që ne si PD dhe opozitë të marrim përgjegjësitë tona për 25 prillin dhe post25 prillin, dhe ne duhet t’i marrim që sot këto përgjegjësi, pasi pikërisht tani është koha. PD dhe opozita ka bërë një opozicion shumë të vështirë gjatë këtyre 8 viteve, por edhe rezultativ, duke hedhur themelet e dekriminalizimit të politikës, si dhe duke denoncuar qeverisjen e llahtarshme, krimin dhe korrupsionin qeveritar të rilindjes. Tani është koha që

PD dhe opozita të ndezë motorët e fushatës, të zbresë “në fushën e lojës”, në “fushëbetejën” e 25 prillit me programin më të mirë të këtyre 30 viteve, me formacionin e vet parlamentar dhe qeverisës më të mirë për të ngjallur shpresën dhe besimin e popullit, për të dhënë mesazhin se ky vend mund të bëhet dhe se situata pas 25 prillit do të ndryshojë radikalisht dhe se këtë ndryshim të madh e kemi ne qytetarët e këtij vendi në dorë dhe askush tjetër. Ne si PD dhe opozitë duhet të inspirojmë dhe të frymëzojmë dhe të gjitha shanset dhe mundësitë i kemi pasi kemi lidershipin dhe programin më të mirë, kemi kauzën dhe mbi të gjitha kemi popullin me vete, mjafton që këta komponentë që na sjellin fitoren plebishitare të mirëmenaxhohen në kohën, mënyrën dhe vendin e duhur. Edhe të gjitha sondazhet reale, serioze dhe jo të blera, na nxjerrin në avantazh si PDnë, edhe si opozitë, por kjo nuk duhet të na vetëkënaqë dhe as të na vërë në gjumë. Ne duhet ta materializojmë të gjithë këtë urrejtje dhe pakënaqësi popullore ndaj sektit të rilindjes, duke e shndërruar atë në shpresë, besim, mirëkuptim dhe kjo arrihet me një regjim pune 24 orë në 24 orë, në çdo pëllëmbë të vendit dhe me çdo qytetar, në mënyrë që me datën 25 prill kutitë e votimit të jenë të mbushura plot dhe në favor te opozitës nga vullneti popullor. Fillimisht dhe urgjentisht ne duhet t’i bindim shqiptarët se ne do të rimëkëmbim ekonominë e rrënuar me qëllim që të rrisim mirëqenien e qytetarëve nëpërmjet motivimit të bizneseve dhe nxitjes së prodhimit vendës. Nevojë emergjente do të jetë eliminimi i pasojave të tërmetit dhe të pandemisë nëpërmjet mirëmenaxhimit të fondeve buxhetore dhe donacioneve me moton “korrupsion zero”. Reformat radikale në fushën ekonomike do të rikthejnë tregun e lirë me qëllim punësimin e shqiptarëve. Rishikimi i politikave fiskale që konsiston në uljen e taksave, aplikimi i modelit të taksës së sheshtë 9%, si dhe rregullimi i akcizave doganore që motivojnë zhvillimin ekonomik vendës do të përbëjnë prioritete të padiskutueshme. Rritja progresive si dhe indeksimi i pagave dhe pensioneve, si dhe rikthimi i shpërblimeve të dy pagave në vit do të jenë motivuese për administratën publike si dhe punonjësit e korporatave dhe ata të sektorit privat. Urgjentisht duhet rikthyer pluralizmi politik, funksionimi i demokracisë, shteti i së drejtës, ndarja dhe balancimi i pushteteve, si dhe kontrolli i qeverisjes. Do të kryhen reformat të thella dhe vitale në sektorët jetikë të shëndetësisë dhe të arsimit, sidomos të arsimit të lartë. Rinia do të jetë prioritet i padiskutueshëm i programit tonë qeverisës. Reforma të thella do të ketë në administratën publike, në çështjet e pronësisë, turizmit, si dhe në nxitjen e investimeve të huaja direkte. Dekriminalizimi i politikës, ndarja e politikës dhe administratës publike nga krimi, përfshirë edhe reformimin rrënjësor dhe dekriminalizimin e Policisë së Shtetit, do të jenë emergjenca të qeverisë së re “Basha”. Riformatim i diplomacisë dhe rikthimi i seriozitetit në marrëdhëniet ndërkombëtare si partner dhe jo si karagjoz apo vasal, ku prioritete absolut kanë marrëdhëniet me SHBA-në dhe BE-në, përfshirë edhe normalizimi i marrëdhënieve me Kosovën tmerrësisht të dëmtuara nga Edi Rama për llogari të Aleksandër Vuçiçit. Natyrisht që do të ketë shumë e shumë sfida për qeverinë e re të PD-së dhe opozitës dhe janë të gjitha shanset dhe mundësitë për të pasur një qeverisje të suksesshme, që punon për Shqipërinë dhe shqiptarët. Presidenti francez Holland sfidoi dhe fitoi zgjedhjet para disa vitesh përballë Presidentit në detyrë, Sarkozy, me moton “Unë nuk do të bëj ato që ka bërë Sarkozy”, por për Shqipërinë nuk mjafton vetëm motoja që “ne nuk do të bëjmë ato që ka bërë Edi Rama”, pasi kjo do të ishte gjysma e parë e motos, e cila do të plotësohej me gjysmën tjetër se “ne do të bëjmë këto… dhe këto…edhe këto… të mira” për Shqipërinë dhe shqiptarët, pasi ne e duam këtë vend dhe këtë popull dhe do të jemi krenar dhe misionarë që t’i shërbejmë popullit tonë për ta çuar me dinjitet në familjen e kombeve të prosperuara të Europës”.

Presidenti francez Holland sfidoi dhe fitoi zgjedhjet para disa vitesh përballë Presidentit në detyrë, Sarkozy, me moton “Unë nuk do të bëj ato që ka bërë Sarkozy”, por për Shqipërinë nuk mjafton vetëm motoja që “ne nuk do të bëjmë ato që ka bërë Edi Rama”, pasi kjo do të ishte gjysma e parë e motos, e cila do të plotësohej me gjysmën tjetër se “ne do të bëjmë këto… dhe këto…edhe këto… të mira” për Shqipërinë dhe shqiptarët, pasi ne e duam këtë vend dhe këtë popull dhe do të jemi krenar dhe misionarë që t’i shërbejmë popullit tonë për ta çuar me dinjitet në familjen e kombeve të prosperuara të Europës”