TABELAT E PLOTA Koeficientet para 1994, ja sa rriten pensionet
Gazeta zbardh tabelat e koeficienteve të indeksimit të pagave për pension. Sa ndryshon masa mujore e pagesës për çdo kategori pensionistësh. Të dhënat për 83 profesione
Për pensionet që do të lidhen deri në prill të këtij viti, si referuese do të shërbejnë pagat e rivlerësuara me koeficientët e një viti më parë.
Gazeta boton sot tabelën me pagat e para '94 të rivlerësuara, si edhe koeficientët që aplikohen deri në 2018, duke iu dhënë mundësinë pensionistëve që të llogarisin vetë masën e përfitimit. Përditësimi i koeficienteve, ashtu si çdo vit tjetër, do të bëhet në muajin prill. Por, deri atëherë do të aplikohen koeficientët ekzistues. Praktika e rivlerësimit u jep mundësi të gjithë atyre që dalin këtë vit në pension që të përfitojnë më tepër. Kjo, sepse krahas viteve kontributive, peshë ka edhe paga, mbi bazën e së cilës janë derdhur kontributet. Sa më e lartë të jetë baza e vlerësueshme për efekt të llogaritjes së pensionit, aq më i lartë do të jetë edhe përfitimi mujor. Janë mbi 15 mijë persona që mbushin këtë vit moshën e daljes në pension dhe që do të përfitojnë nga ky ndryshim.
RIVLERËSIMI Por, si ka ndryshuar niveli i pagave për 83 profesione të para '94-s dhe pas këtij viti pas miratimit të koeficienteve të rinj? Kështu, pas rivlerësimit të bërë vjet me koeficientin 9.302, pagat e para '94-ës, në raport me një vit më parë, kanë njohur një rritje, e cila varion nga 580 lekë deri në 1792 lekë. Konkretisht, për ata që kanë pas punuar në ndërmarrjet e kohës, paga për efekt të llogaritjes së pensioneve do të jetë 39 254 lekë. Ose të punësuarit në ndërtim, paga për efekt pensioni do të jetë 28 492 lekë. Shtesa e miratuar do të reflektohet në masën e përfitimit për ata të cilët dalin këtë vit, duke sjellë pensione më të larta. Sipas tabelës zyrtare, aktualizimi i pagave mbi bazën e së cilës janë derdhur kontributet deri në vitin 1994 bëhet me koeficientin 9.302. Pas këtij viti, koeficientët janë të ndryshëm. Kështu, për vitin 1994, koeficienti nga 7.311 që ka qenë bëhet 7.486, ndërsa një vit më vonë, nga 5.672 bëhet 5.808. Kjo vazhdon deri në vitin 2018, ku koeficienti i indeksimit është 1.024. Për dy vitet e fundit, pra, për 2019 dhe 2020, nuk aplikohet formula e indeksimit, por pagat referohen aq sa janë, pra të paindeksuara. Për efekt të llogaritjes së pensionit mblidhen të gjitha pagat dhe të gjithë muajt, duke dalë një pagë mesatare e rivlerësuar mujore, e cila quhet bazë e vlerësueshme.
FORMULA Për të përfituar pension të plotë duhen 37 vite e 4 muaj periudhë kontributive. Formula e re përcakton një pension bazë dhe shtesën. Pensioni bazë është 7637 lekë, ndërsa shtesa bazuar në formulën e llogaritjes së pensionit është 1% për çdo vit sigurimi, shumëzuar me bazën mesatare të vlerësueshme, që personat e siguruar kanë arritur nëpërmjet kontributeve të paguara. "Bazë mesatare e vlerësuar" nënkupton pagën bruto, mbi të cilën është aplikuar norma e kontributit të detyrueshëm të sigurimeve shoqërore sipas viteve dhe është kjo pagë mujore, që rivlerësohet e aktualizohet duke përdorur koeficientët e indeksimit të çdo viti, deri në momentin e lindjes së të drejtës dhe plotësimit të kushteve për të përfituar një pension.