Dy të vdekur pas vaksinës, mjekët ndahen për përdorimin
Ndërron jetë një 74-vjeçare nga Berati e një 88-vjeçar nga Tirana. Bino: Vaksina të mbron nga COVID, jo nga sëmundjet e tjera
Shtohen dyshimet për efektivitetin dhe sigurinë e vaksinës kineze “CoronaVac”. Ka qenë eksperti i shëndetit Publik Erion Dasho ai i cili një ditë më parë ka ndarë në rrjetet sociale lajmin se dy persona kanë ndërruar jetë pasi kanë injektuar vaksinën.
Doktori u ka bërë apel autoriteteve shëndetësore në vend që të ndalin fushatën e imunizimit dhe të hetojnë rastet në fjalë, për të hedhur dritë mbi shkaqet që çuan në humbjen e jetës. “Për shkak të të paktën dy vdekjeve të papritura midis personave që kanë kryer vaksinën ‘CoronaVac’ (një prej të cilave rast i investiguar personalisht që humbi jetën një ditë pas vaksinimit), i rekomandoj Ministrisë së Shëndetësisë, Komitetit të COVID dhe Komitetit të Imunizimit të pezullojnë përkohësisht fushatën e imunizimit me ‘CoronaVac’ deri sa këto vdekje të investigohen dhe të provohen si të palidhura me vaksinën në fjalë. Kjo thirrje nuk ka aspak qëllim të ngjallë panik dhe të dëmtojë një proces të dobishëm, siç është imunizimi ndaj COVID. Thjesht është në përputhje me praktikat e mira ndërkombëtare të farmako-vigjilencës”, ka vënë në dukje Dasho. Sipas tij, dy humbje jete midis rreth 50 mijë të vaksinuarve është një tregues që kërkon kujdes të jashtëzakonshëm. Mësohet se përgjatë kësaj jave, kur edhe ka nisur vaksinimi masiv i personave mbi 70 vjeç, kanë ndërruar jetë pas injektimit të dozës së parë dy persona. Bëhet fjalë për një 74-vjeçare nga Berati, si edhe një 88-vjeçar nga Tirana, i cili ka shfaqur vështirësi në frymëmarrje.
BINO Ndërsa pikëpyetjet dhe pasiguria mbi vaksinën kineze janë rritur ndjeshëm, autoritetet vijojnë të mbyllin njërin sy, duke thënë se vaksina nuk është shkak i humbjeve të jetës dhe se jo çdo vdekje pas vaksinimit ka lidhje me të. E thënë kështu, shkaktarët që çuan në humbjen e jetës së dy personave pas vaksinimit do të mbesin në hije sa kohë s’do të ketë hetim për rastet. Në komunikimin për mediat, shefja e departamentit të Epidemiologjisë në ISHP, Silva Bino, tha se vaksina anti-Covid të mbron nga COVID-19, jo nga sëmundjet e tjera. “Vaksinat janë të sigurta, sepse përpara marrjes së vaksinës në vendin tonë, ka një seri dokumentesh në një seri kriteresh, të cilat duhet të plotësohen. Ka edhe një komitet të ekspertëve për vaksinimin, i cili i vlerëson të gjitha këto elemente dhe natyrisht kjo mbështetet në të gjitha të dhënat ndërkombëtare, në të gjitha vendet ku vaksinat janë përdorur në masë, në miliona njerëz edhe më tej nga studimet e publikuara”, tha më tej Bino.
FLET MJEKJA Mjekja e familjes Kamela Musa, e cila ka ndjekur rastin e 74vjeçares në Berat, thotë se e ka gjetur pa shenja jete dhe ka kërkuar nga bashkëshorti i saj që të bëhej autopsia, por ky i fundit ka refuzuar. “Unë e gjeta pa frymëmarrje, pa puls. Duke qenë se e gjeta të vdekur, ngula këmbë në mënyrë shumë me të shoqin që të dërgohej në morg për t’u përcaktuar diagnoza, pasi nuk vendosja dot diagnozë, por burri refuzoi në mënyrë kategorike autopsinë. U gjenda e detyruar t’i merrja një deklaratë që refuzon autopsinë, pasi e kisha të pamundur t’i gjeja një shkak”, tha në një prononcim për “ABC News” mjekja Musa. Donika Babunja, 74-vjeçarja nga Berati, ndërroi jetë mbrëmjen e së mërkurës, 10 orë pasi kishte bërë vaksinën kineze “CoronaVac”. Shqetësimet kishin nisur të shfaqeshin disa orë pas injektimit të dozës së parë. E moshuara ankohej për dhimbje të barkut dhe se kishte të vjella. Në mbrëmje gjendja e saj shëndetësore është rënduar ndjeshëm. Kur ambulanca arriti në banesë, 74-vjeçarja kishte ndërruar jetë.
VAKSINIMI Prej së dielës në të gjithë vendin ka nisur vaksinimi masiv i personave mbi 70 vjeç. Qeveria nuk humbi asnjë ditë kohë për të vaksinuar të moshuarit me vaksinën kineze, për të cilën u tha që janë siguruar 1 milion doza. Përveç shkallës së ulët të efektshmërisë, gati 50 për qind, një tjetër pikë që ka hapur debat janë edhe grupmoshat mbi të cilat po aplikohet. Kujtojmë që në vendin e origjinës, në Kinë, kjo vaksinë nuk aplikohet në grupmoshat mbi 59 vjeç.