Pagë mujore për djalin dhe 10 mijë USD, “Eurosig-Insig” solidarizohet me familjen e Arjan Salës
Pagë mujore për djalin e dëshmorit dhe 10 mijë dollarë për familjarët
Presidenti i grupit "Eurosig-Insig" dhe "UBA Bank", z. Kadri Morinaj, gjatë vizitës për ngushëllim pranë familjes së heroit Arjan Sala, dorëzoi çekun e akorduar prej 10,000 dollarë.
Gjithashtu, z. Morinaj njoftoi përmes CEO-s së "UBA Bank", z. Amel Kovaçeviç, se familjarëve e djalit të Dëshmorit të Atdheut do t'u ofrohet një përkujdesje financiare mujore deri në përfundimin e studimeve të larta, me qëllim që edhe ai të rritet dhe të edukohet si gjithë fëmijët e tjerë. "Akti i shefit të Sigurisë në zjarrin e rënë te 'Casa Italia' ishte një akt heroik, sublim dhe i pashembullt, mund të themi në dekada. Arjan Sala ishte ai që shpëtoi 22 jetë njerëzish, duke sakrifikuar jetën e tij dhe nuk hyri mes flakëve për familjarët e tij, por ai hyri për kolegët e punës, duke i shpëtuar ata. Jo vetëm kaq, por ai shpëtoi 22 jetë njerëzish duke mbrojtur edhe 22 familje pas tyre, të cilët përpos fatkeqësive dhe ngushëllimeve që mund të kishin, do të përballeshin më pas edhe me pasoja ekonomike. Kështu që, në vetvete ky njeri u kthye në një polic sigurimi jete për 22 punonjësit e tij. Djali dhe familja e Arjanit meritojnë përkujdesje maksimale. Përpos 10,000 dollarëve për familjen e tij, djali i tij do të ketë një pagë çdo muaj deri kur ai të mbarojë studimet e larta. U prehtë në paqe Arjan Sala", u shpreh Morinaj. Në lidhje me legjislacionin për sigurimet, presidenti i grupit "Eurosig-Insig" apeloi për qeverinë të ndërhyjë në ligjin e sigurimeve, duke futur dëmshpërblimet si për jetët e humbura ashtu edhe për dëmet nga fatkeqësitë natyrore. "I bëj thirrje qeverisë së sotme edhe të nesërme: Tashmë është domosdoshmëri që sa më shpejt të jetë e mundur Parlamenti i ri duhet të miratojë ligjin e detyrueshëm ndaj fatkeqësive natyrore, siç janë zjarri, përmbytjet dhe tërmetet, ku vetëm 3 muajt e fundit kemi pasur mbi 20 raste zjarri në Shqipëri dhe mbi 5 viktima. Nëse do të kalkulojmë kostot e dëmeve të këtyre banesave dhe bizneseve, ato kalojnë shifrën e 1 milion eurove. Ndërsa për shtresat në pamundësi ekonomike, unë propozoj që sigurimi i detyrueshëm i pronës të subvencionohet nga shteti. Nëse do të ishin të siguruara, të gjitha kostot e dëmeve do të paguheshin menjëherë nga kompania e sigurimeve.
Gjithashtu duhet të sigurohen edhe jetët e punonjësve të Sigurisë dhe të gjithë punonjësit e Policisë së Shtetit, pasi ata janë gjithnjë të rrezikuar në përballje me kriminelë dhe të paktën familjet e tyre do të marrin një dëmshpërblim ekonomik." Nga ana tjetër, Morinaj përgëzoi aprovimin e ligjit të TPL-së dhe nismën për ndryshimin e Kodit Rrugor që pritet të aprovohet së shpejti. "Kohët e fundit është vënë re një shtim i dukshëm i aksidenteve rrugore. Besoj që kjo vjen edhe si pasojë e amortizimit të rrugëve, por nuk është vetëm kaq sepse ka papërgjegjshmëri edhe nga drejtuesit e automjeteve.
Lidhur me këtë, ligji i sigurimeve motorike që kaloi Parlamenti shqiptar është një vlerë e shtuar, ku u rrit limiti i përgjegjësisë pothuajse mbi 60 % i dëmshpërblimeve për secilën figure dëmi, siç janë ai biologjik, moral apo ekzistencial. Gjithashtu ligji qartësoi mënyrën e përllogaritjes sipas direktivave të Bashkimit Europian, duke shmangur sa më shumë abuzimet që bëjnë avokatët apo gjyqtarët e pandershëm. Mirëpresim Parlamentin shqiptar edhe për miratimin e Kodit Rrugor. Gjithashtu, do të jetë një parandalues që u shërben drejtuesve të automjeteve për eliminimin e aksidenteve".