Bilanci ditor, ulen rastet dhe viktimat si pasojë e COVID-19

Edhe të enjten ka vijuar stabiliteti i shifrave të COVID-19 në vend. Ndonëse është bërë një numër i konsiderueshëm testimesh, nuk janë identifikuar më tepër se 349 pacientë të rinj me COVID19. “Janë kryer 2899 testime, nga të cilat kanë rezultuar pozitivë 349 qytetarë. Rastet pozitive të konfirmuara janë identifikuar në këto bashki: 81 raste në Tiranë, 25 raste në Shkodër, 22 raste në Korçë, 15 raste në Berat, 14 raste në Durrës, 13 raste në Fier, 12 raste në Gjirokastër, Pogradec, 11 raste në Tropojë, 10 raste në Lezhë, Vlorë, 9 raste Devoll, Kukës, Lushnje, Sarandë, 7 raste në Krujë, Kurbin, Elbasan, Ura Vajgurore, 6 raste në Kavajë, 5 raste në Kamzë, Libohovë, 4 raste në Librazhd, Cërrik, 3 raste në Mallakastër, Malësi e Madhe, Kuçovë, Vorë, 2 raste në Mat, Delvinë, Selenicë, Përrenjas, Skrapar, Patos, Poliçan, 1 rast në Has, Mirditë, Përmet, Tepelenë, Divjakë, Dibër, Bulqizë, Himarë, Kolonjë, Gramsh”, thuhet në komunikimin ditor të ministrisë së shëndetësisë, ndarë për mediat. Nga ana tjetër ka një lajm të mirë për të shëruarit që përllogariten automatikisht 14 ditë pas infektimit dhe janë thuajse dyfish në raport me numrin e të infektuarve rishtazi. “Në 24 orët e fundit janë shëruar 604 qytetarë, duke e çuar numrin e të shëruarve në 91,875 që nga fillimi i epidemisë”. Edhe spitalet janë drejt kapaciteteve normale. Dhe numri i atyre që vuajnë në reanimacion apo në intubim, për fat të mirë sa vjen e reduktohet. Aktualisht në katër spitalet COVID në Tiranë dhe tre spitalet rajonale po trajtohen 279 pacientë, prej të cilëve nëntë në terapi intensive, dhe dy pacientë janë të intubuar. Sakaq, numri i atyre që nuk ia dolën dot në përballjen me virusin dje u ul në gjashtë duke e çuar totalin e fataliteteve të raportuara zyrtarisht në 2241. “Me gjithë përpjekjet e stafit mjekësor, 6 qytetarë e kanë humbur betejën me COVID-19: 2 qytetarë nga Tirana, 2 qytetar nga Elbasani, 1 qytetar nga Durrësi, 1 qytetar nga Kavaja, të moshave 66 – 84 vjeç”. Në të gjithë vendin numërohen mbi 31 mijë raste aktive, prej të cilave një e treta ndodhen vetëm në tiranë. Jo më pak problematikë paraqiten Fieri, Durrësi, Gjirokastra e Shkodra që kanë mbi një mijë raste aktive me COVID-19. Pavarësisht numrit të tamponëve të kryer, ka një tregues që nuk ka ndryshuar që në krye të herës. Me luhatje tejet të lehtë nga dita në ditë, shkalla e pozitivitetit mesatarisht mbi 20%. Po të shikojmë tabelën, nga mbi 561 mijë testime të kryera që nga muaji mars, janë identifikuar 125 mijë raste pozitive. Pra, një e pesta.