KPK konfirmon në detyrë kryeprokuroren e Tiranës
Elisabeta Imeraj kaloi me sukses të tri kriteret e kontrollit
Komisioni i Pavarur i Kualifikimit, në unanimitet të plotë, konfirmoi dje në detyrë prokuroren Elisabeta Imeraj.
Imeraj, pas kontrollit të procesit të vetingut, për të tria kriteret, pasurinë, aftësitë profesionale dhe pastërtinë e figurës, u konsiderua e rregullt dhe në përputhje me ligjin. Imeraj, e emëruar së fundmi nga KLP-ja si drejtuese e Prokurorisë së Tiranës, është konsideruar ndër vite si gruaja e hekurt e Prokurorisë për shkak të dosjeve të forta që ajo ka hetuar, për çështje që nisin nga historitë e terrorizmit ndërkombëtar, deri te grupet kriminale. Që prej vitit 2017, Elisabeta Imeraj është në mbrojtje nga shteti, duke qenë se ka hetuar një grup kriminal, që është përfolur shpesh nga ndërkombëtarët, të cilët kërkonin që ligji të tregonte fuqinë e tij për të. Përveç çështjeve të forta që ajo ka hetuar, Elisabeta Imeraj, edhe kur ka qenë prokurore e thjeshtë, ka qenë në vëmendje të mediave për shkak edhe të hetimit të ish-ministrit të Brendshëm, Saimir Tahiri. Ajo do të mbahet mend edhe për përballjen e fortë, mbi 5 orë me vëzhguesin e ONM-së, ku mbi të gjitha përveç rivlerësimit dhe asaj që ajo konsideroi si një proces bazuar në prova dhe në fakte, dha mesazhin se njerëzit e drejtësisë, kur kalojnë pragun e vetingut duhet të përballen me dinjitet me këtë proces. Drejtuesja e Prokurorisë së Tiranës, Elisabeta Imeraj, doli një javë më parë para institucioneve të vetingut për vlerësimin e figurës. Më herët, KLP-ja kreu vlerësimin etik dhe profesional të prokurores dhe në mënyrë unanime votuan për ta lejuar atë të vijojë ngjitjen në karrierë. Ajo është zgjedhur nga KLP-ja në krye të Prokurorisë pranë Gjykatës së Shkallës së Parë Tiranë për një mandat 3-vjeçar. Elisabeta Imeraj përfundoi Shkollën e Magjistraturës në vitin 2005 dhe punoi për 13 vite si prokurore në Prokurorinë e
Krimeve të Rënda. Në gusht të vitit 2018, ajo u komandua si drejtuese e Prokurorisë së Tiranës, ndërkohë që kish- te kandiduar për t’u bërë pjesë e Prokurorisë së Posaçme, SPAK. Vendimi që konfirmoi në detyrë kryeprokuroren e Tiranës, Elisabeta Imeraj, u dha nga trupa gjykuese e përbërë nga Olsi Komici, Roland Ilia. si dhe Suela Zhegu.