Ardian Çapja merr masën e sigurisë në spital, provë dëshmia e Ervis Bardhit
Gjykata e Elbasanit u zhvendos dje në katin e tretë të Kirurgjisë në QSUT ku është shtruar Ardian Çapja, i cili dyshohet se bashkë me nipin e tij Florenc Çapja kanë organizuar dhe financuar vrasjen e Gentian Beqirit dhe babait të tij, Nezir Beqirit, në vitin 2012. Për 53-vjeçarin u caktua masa “Arrest me burg”, ndërsa nipi i tij është shpallur në kërkim. Seanca gjyqësore u mbaj nën masa të rrepta antiCOVID nga njëra anë dhe në anën tjetër nën masa të rrepta sigurie për shkak të personalitetit të Çapjas, i cili është konsideruar sipas policisë si kreu i grupit kriminal që urdhëronte vrasje me pagesë. Edhe në rastin konkret, ka dyshime të forta se Ervis Bardhi, i cili ka qëlluar për vdekje Gentian Beqirin, në bashkëpunim me disa të tjerë, ka vepruar kundrejt një shumë prej 50 mijë eurosh, të paguara sipas tij nga Ardian dhe Florenc Çapja. Dy prokurorët e çështjes, Kreshnik Ajazi e Ridvan Sukaj, mbërritën në QSUT nën masa të rrepta sigurie, për shkak edhe të rrezikut që i kanoset. Prova që kanë paraqitur në seancë prokurorët ka qenë dëshmia e të penduarit Ervis Bardhi. Nga ana tjetër avokatët e Çapjas e kanë konsideruar të pabesueshëm Ervis Bardhin dhe kanë kërkuar që dëshmia e tij mos të merret në konsideratë nga ana e Gjykatës. Fill pas arrestimit, njeriu shumë i përfolur për botën e krimit, 53vjeçari Çapja, është transferuar me urgjencë nga ambientet e paraburgimit në repartin e kardiokirurgjisë, pasi ka shfaqur probleme me zemrën. Mësohet se Çapja i është nënshtruar koronarografisë dhe një ndërhyrjeje tjetër. Çapja shfaqi probleme dhe për faktin se në qershor të viti të kaluar i mbijetoi një atentati pranë banesës së tij, ndërsa u qëllua me snajper nga Kodra e Krastës nga një largësi prej 400 metrash. Dëshmia e të penduarit të drejtësisë, Ervis Bardhi, çoi në pranga Ardian Çapjan, ndërsa vijon të jetë në kërkim Florenc Çapja. Në dosjen e Prokurorisë, të siguruar nga gazeta “Panorama”, Bardhi ka rrëfyer midis të tjerash edhe për vrasjen e Gentian Beqirit. Sipas tij, për këtë vrasje, Ardian Çapja i ka ofuar 50 mijë euro. “Ardian Çapja me ofroi 50 mije euro për vrasjen e Gentian Beqirit. Realizimi i vrasjes ishte i vështirë, sepse Beqiri ishte ne ruajtje nga policia, pasi dyshohej për vrasjen e Sokol Capjas ne 2005. Takimet me Ardianin i kam pasur ne hotelin e tij”, ka thënë Bardhi në rrëfimin e tij.