Gara për hetues në BKH, kualifikohen 28 kandidatë
Skualifikohen 9 konkurrentë të tjerë në “testin” e sigurisë
Janë certifikuar 28 kandidatë që konkurrojnë për në Byronë Kombëtare të Hetimit. Ndërsa, deri tashmë, në garën për hetues të BKH-së, 9 kandidatë janë skualifikuar. Që të jetë funksionale, BKH-ja duhet të ketë minimalisht 60 hetues, ndërsa në njoftimi thuhet se procesi i rekrutimit për 32 emra të rinj do të hapet në ditët në vijim. Komisioni i Posaçëm i Verifikimit të Pasurisë dhe Figurës në datë 01.04.2021, mbylli verifikimin e kushteve të sigurisë për kandidatët që konkurrojnë për “Hetues” në Byronë Kombëtare të Hetimit dhe ka vendosur që nga 37 kandidatë: 28 kandidatë kalojnë kushtet e sigurisë dhe 9 kandidatë nuk i kalojnë kushtet e sigurisë. Sipas njoftimit të BKH, kandidatët që kanë kaluar ose jo kushtet e sigurisë, do të njoftohen individualisht. Kandidatët e kualifikuar do ti nënshtrohen trajnimit me një sërë modulesh vlerësimi që duhen kaluar përpara se të certifikohen. Vendi, data dhe ora e zhvillimit të trajnimit dhe udhëzime të hollësishme do të njoftohen në ditët në vijim në “website”-in e BKH-së, “bkh.al”. Verifikimi i kushteve të sigurisë u zhvillua nën vëzhgimin dhe monitorimin e Komisionit të Pavarur të Rishikimit, të caktuar nga misionet e Qeverisë së Shteteve të Bashkuara të
Amerikës dhe Bashkimit Europian në Shqipëri. Në ditët në vijim do të hapet dhe procesi i rekrutimit për 32 (tridhjetë e dy) pozicionet “Hetues”, të paplotësuara. Njoftimi për hapjen e procesit të rekrutimit do të bëhet në “website”-in e BKH-së. “Falënderojmë gjithë kandidatët që shprehën vullnetin për të marrë pjesë në këtë konkurrim”, thuhet në njoftimin e Byrosë Kombëtare të Hetimit.