LVV: Nëse Osmani nuk zgjidhet Presidente, Kosova shkon në zgjedhje
“Në rrethanat aktuale, zgjedhjet nuk janë në dobi për qytetarët apo partitë politike në Kosovë”
Votimi për Presidentin në Kosovë pritej të mbahej sot, por Lëvizja Vetëvendosje ende nuk ka mbledhur nënshkrimet për thirrjen e seancës së jashtëzakonshme.
Lidhja Demokratike e Kosovës, gjatë kësaj jave mori vendimin që të mos jetë pengesë në procesin e zgjedhjes së Presidentit të vendit. Prania e deputetëve të LDK-së në seancën e Kuvendit të Kosovës, kur do të votohet për zgjedhjen e Presidentit, është e domosdoshme për mundësimin e kuorumit në këtë proces. Sa për seancën, Mimoza Kusari-Lila, shefe e Grupit Parlamentar të Lëvizjes Vetëvendosje, grupi më i madh parlamentar në Kosovë, tha për REL se LVV-ja është duke punuar që sa më parë të mblidhen nënshkrimet për seancën, “e suksesshme, e cila do ta nxjerrë presidenten e ardhshme të Republikës së Kosovës”. Sipas saj, Vjosa Osmani, e cila është propozuar nga Lëvizja Vetëvendosje për pozitën e presidentit të vendit, i ka votat e mjaftueshme për t’u zgjedhur presidente në raundin e tretë të votimit. “Duhet të sigurohemi që do të ketë 80 deputetë, të cilët do të votojnë edhe në dy raundet e para, pa marrë parasysh preferencën e tyre në këtë rast, për faktin që është i domosdoshëm si proces, i vendosur nga aktvendimi i Gjykatës Kushtetuese. Ne mund të konfirmojmë për votat, të cila janë. Ato janë votat e shumicës për zgjedhje, në herën e tretë.
Megjithatë, mbetet të konfirmohet vullneti dhe prezenca e deputetëve për pjesëmarrje në procesin e votimit edhe për dy raundet e para dhe të tretin, kur mund të dalë fituese zonja Osmani, si presidente e Republikës”, tha Kusari-Lila.
Ndërsa Lidhja Demokratike e Kosovës, gjatë kësaj jave ka bërë të ditur qëndrimin politik se deputetët e saj do të qëndrojnë në sallë gjatë seancës së Kuvendit për zgjedhjen e Presidentit si dhe do të votojnë. Këtë e ka rikonfirmuar për “Radion Europa e Lirë” shefi i Grupit Parlamentar të Lidhjes Demokratike të Kosovës, Arben Gashi. Sipas tij, ky është vetëm qëndrimi politik i partisë së tij. “Politikisht, ne kemi marrë qëndrim që të marrim pjesë në seancë dhe të marrim pjesë në votim. Pastaj, se a do të ketë ndonjë deputetë që ka mendim ndryshe, është çështje individuale”, theksoi Gashi. Ende nuk dihet nëse të gjithë deputetët e kësaj partie, që janë 15 në Kuvend, do të marrin pjesë në procesin e votimit.
Nëse nuk sigurohet numri i domosdoshëm i deputetëve të pranishëm në seancë, që procesi i zgjedhjes së presidentit të jetë i suksesshëm, sipas Kusari-Lilës, nuk do të ketë seancë për Presidentin. “Sa ta kemi të plotë numrin, nuk do të hyjmë në proces të tillë, derisa ta dimë saktë se do të jenë këto vota ose në të kundërtën, mund të hyjmë në proces pa pasur konfirmime finale. Pastaj, se cila është alternativa, në rast të mospasjes sukses të procesit të zgjedhjes së presidentes, është shkuarja në zgjedhje, të cilat në rrethanat aktuale, nuk shihen si ajo çfarë do të jetë e dobishme për qytetarët apo edhe për partitë politike në Kosovë”, u shpreh Kusari-Lila.