“Patronazhimi” i PS, Najada Çomo preferon LSI-në, por voton PD-në

Që pas zbulimit të databazës së famshme së të dhënave të Partisë Socialiste, me sistemin e “patronazhit”, asaj nuk i kanë “shpëtuar” dhe vetë kandidatët për deputetë, apo ministrat e qeverisë Rama. Një prej kandidatëve e prezantuar si risi në këto zgjedhje, shefja e Spitalit Infektiv, Najada Çomo. Në bazën e të dhënave të PS-së, patronazhistja, Vjola Sterjo shkruan se Najada Çomo, nuk është votuese e “sigurt” e PS-së, ajo ka si preferencë Lëvizjen Socialiste për Integrim, ndërkohë që sipas censusit të 2013-ës ajo ka votuar për Partinë Demokratike. Listës së kandidatëve të PS-së, që kanë votuar PD-në në 2013 sipas databazës së sistemit të patronazhit, figuron edhe Dallëndyshe Bici, drejtoresha e IKMT-së. Votuese të Partisë Demokratike sipas të dhënave të sistemit të patronazhit rezultojnë edhe dy ministret kryesore të qeverisë së Kryeministrit Rama. Në të dhënat e vendosura në sistemin e PS-së, patronazhisti i ministres së Drejtësisë, Etilda Gjonaj, cilësohet si votë e “sigurt” me preferencë Partinë Socialiste, por në censusin e vitit 2013, ajo është regjistruar si votuese e Partisë Demokratike. Për ministren e Financave dhe Ekonomisë, Anila Denaj, patronazhuesi me emrin Malo Hizdi, e ka regjistruar si të “sigurt” dhe me preferencë për PS-në, por në zgjedhjet e vitit 2013, ajo ka votuar Partinë Demokratike. Në listën e kandidatëve për zgjedhjet e vitit 2021, janë dhe katër emra të cilët u “importuan” në Partinë Socialiste, por që sipas sistemit të patronazhit rezultojnë si votues të Partisë Demokratike. Patronazhistët janë kujdesur të shënojnë emrat e Halit Valterit, Tahir Muhedinit, Ylli Shehut dhe Alqi Bllakos.