Pas Erdogan edhe Zaev mbështet Ramën në zgjedhje
Kryeministri thirrje pakicës maqedonase: Votoni Edi Ramën!
Nuk është vetëm Turqia dhe miku i tij, Rexhep Tayp Erdogan, por në mbështetje të Kryeministrit Edi Rama në zgjedhjet e 25 prillit vjen edhe Kryeministri i Maqedonisë së Veriut, Zoran Zaev. Kreu i qeverisë së vendit fqinj ka shfaqur hapur mbështetjen për Edi Ramën, duke dhënë mesazhin se ai është i duhuri për Shqipërinë, pasi ka bërë pjesë të listës së PS-së një anëtar të komunitetit maqedonas në vendin tonë. Përmes një video-mesazhi, Zaev u ka bërë thirrje shtetasve maqedonas që jetojnë në Shqipëri të votojnë Edi Ramën dhe Vasil Sterjovskin, maqedonasin që është pjesë e listës së kandidatëve të PSsë në qarkun e Korçës. “Të dashur maqedonas, qytetarë të Republikës së Shqipërisë, Shqipëria do të mbajë zgjedhjet parlamentare më 25 prill, dhe një nga kandidatët në listën e Partisë Socialiste, mikut tim të dashur Edi Rama, është edhe Vasil Sterjovski, një maqedonas”, shprehet ndër të tjera Zaev në mesazhin e tij. Presidenti Erdogan ka mbështetur Kryeministrin Rama në këto zgjedhje përmes realizimit të disa projekteve, që vetë kreu i qeverisë shqiptare po i përdor për fushatën elektorale. Ndërtimi i Spitalit Rajonal “Memorial” të Fierit për një kohë rekord, tre muaj, dhe me afat përfundimi përpara zgjedhjeve, nënkupton një prej arsyeve të ndërtimit të tij. Po ashtu, një prej çështjeve më të rëndësishme që kryeministri Rama po përdor në fushatë janë vaksinat. Pikërisht për këtë i ka ardhur në ndihmë miku i tij Erdogan, duke siguruar një sasi të konsiderueshme vaksinash kineze falë miqësisë me Presidentin turk. Vizita pak ditë më parë e ministrit të Kulturës së Turqisë dhe planifikimin për realizmin e projekteve të përbashkëta kulturore në Gjirokastër, gjatë fushatës elektorale është një tjetër shenjë e ndihmës përpara zgjedhjeve. Po ashtu, gatishmëria dhe mbështetja financiare për procesin e rindërtimit, për përshpejtimin e tij është një tjetër ndihmesë që Rama deri pak kohë më parë e përdori për fushatë.