Vrau bashkëshorten, dënohet me 35 vite burg ish-gardisti
Gjykata e Tiranës ka dënuar me 35 vite burg ishgardistin Alket Arapaj, i akuzuar për vrasjen e gruas së tij, Ervilma Seferaj. Ngjarja e rëndë ka ndodhur dy vite më parë, më 12 shkurt 2019. Arapaj ekzekutoi me armën e shërbimit gruan e tij, ku shkak i krimit të rëndë ishte xhelozia. Ishin fqinjët që pas krimit lajmëruan Policinë, pasi dëgjuan të shtënat me armë zjarri dhe fëmijën e mitur të çiftit duke qarë. Policia shkoi menjëherë në vendngjarje, duke bërë të mundur arrestimin në flagrancë te ish-gardistit, i cili nuk bëri rezistencë. Nëna e një vajze 3 vjeçe u qëllua për vdekje nga bashkëshorti gardist pas dyshimeve për tradhti. Ngjarja e rëndë ndodhi rreth orës 06:00 të mëngjesit, në rrugën “Vangjel Capo”, në zonën e Alliasit. Autori i krimit, Alket Arapaj, aktualisht 46 vjeç, ish-kolonel në Gardën e Republikës, teksa bëhej gati për t’u paraqitur në shërbim, ka debatuar me të shoqen, Ervilma Seferaj, 36 vjeçe. Në debat e sipër e ka qëlluar atë tri herë me armën e shërbimit. Menjëherë pas ngjarjes, ai i ka telefonuar sallës operative të Policisë së Tiranës. “Kam vrarë gruan, hajdeni më arrestoni”. Kjo ka qenë telefonata që ka vënë në lëvizje fillimisht shërbimet e Komisariatit Nr.4, që kanë shkuar menjëherë në vendngjarje. Më pas aty kanë mbërritur edhe oficerët e Krimeve të Rënda dhe ekspertë kriminalistë, që kanë nisur veprimet hetimore. Ndërsa autori është prangosur duke u transportuar në Drejtorinë e Policisë së Tiranës. Burimet thanë se në apartamentin e çiftit është gjetur edhe arma e krimit, pistoleta e shërbimit të gardistit, që ekzekutoi bashkëshorten. Pasi ka pranuar autorësinë e krimit, duke lajmëruar vetë Policinë për ngjarjen, Alket Arapaj ka treguar edhe motivet e vrasjes së bashkëshortes. Burimet thanë se nga deklarimet paraprake që ka dhënë para oficerëve të Policisë Gjyqësore, në gjendje të rënduar psikologjike, gardisti ka treguar se gruan e vrau pasi dyshonte se e tradhtonte. Ndërsa ka sqaruar se fillimisht marrëdhënia me të kishte qenë shumë e mirë, por debatet kishin filluar së fundmi, pasi ajo kishte vendosur të fillonte punë.