Tërmeti, 364 familjet që marrin paratë në dorë KOMPENSIMI
Nga DS1-DS4, lista me 156 familjet që marrin pagesa për riparimin e dëmeve si dhe 208 të tjera që përfitojnë para për t'i ndërtuar nga e para
Zbardhet vendimi për kompensimin e familjeve që janë dëmtuar nga tërmeti. Gazeta boton listën me emrat që marrin paratë në dorë sipas kategorisë së dëmeve nga DS1-DS4
Ndonëse në kohë fushate, ekipi i Bashkisë ka punuar për ta çuar përpara programin e rindërtimit pas tërmetit të 26 nëntorit të 2019-ës.
Vetëm pak ditë përpara votimeve, Bashkia e Tiranës ka vendosur ta zgjidhë qesen duke u dhënë para qytetarëve për ta ribërë vetë shtëpinë e tyre dhe në kohën që duan, përmes granteve për rindërtimin. Po ashtu, janë edhe qindra banorë të tjerë të dëmtuar më lehtë, por që kanë aplikuar prej kohësh për të përfituar nga granti i rikonstruksionit. Vetëm tani, ata do të marrin pagesën që iu takon, ndonëse shumica e ka riparuar dëmin me kohë. Gazeta ka siguruar listën e përfituesve, nga të dyja programet, e cila do të marrë "OK" të hënën në Këshillin Bashkiak të Tiranës.
GRANTI PËR RIKONSTRUKSIONET 154 familje që kanë pësuar dëme në banesa, nga ato të lehta deri te çarjet serioze në strukturë, do të përfitojnë një masë nga 100 deri në 500 mijë lekë. Lista fillestare e përfituesve ishte me vetëm 116 emra, por është pasuruar me kalimin e kohës, pas ankimimeve nga qytetarët që u skualifikuan nga masa e përfitimit. "Gjatë procesit të shqyrtimit dhe vlerësimit të dokumentacionit të dosjeve, por në të njëjtën kohë duke mbajtur në konsideratë edhe mendimet e propozimet e sekretariatit, komisioni përgjatë kësaj periudhe, duke përfshirë edhe 34 (tridhjetë e katër) ankesat e pranuara nga organi ankimor, ka arritur të shqyrtojë dhe vlerësojë në total 150 (njëqind e pesëdhjetë) dosje. Gjithashtu, nga organi ankimor nëpërmjet shkresave zyrtare u paraqiten edhe 4 (katër) ankesa mbi nivelin e dëmit të shpallur përfitues. Komisioni, pas shqyrtimit të këtyre ankesave, propozon ndryshimin e vendimeve të grantit të rikonstruksionit", citohet në relacionin e projektvendimit, të ndryshuar përpara se të adresohej për miratim në këshill. Deri më tani numërohen afro dhjetë mijë pagesa cash që Bashkia, përmes fondeve të lëvruara nga pushteti qendror, ka dhënë për riparimin e banesave nga DS1-DS4. GRANTI PËR RINDËRTIMET Një vendim i lënë në hije deri më tani, ai për ndarjen e fondeve për rindërtimin e banesave individuale nga vetë familjet e prekura, i miratuar që në fillim të dhjetorit të 2020-ës, po merr udhë vetëm tani, në prill. Nuk dihet se sa familje në nivel dëmi të kategorizuar DS4/DS5 kanë aplikuar për të përfituar nga ky program, por numri i fituesve po. Sipas relacionit të projektvendimit të paraqitur për miratim, janë kualifikuar 29 dosje të rregullta, ndërsa rrugës janë përfshirë edhe 11 të tjera, vetëm pasi kanë ankimuar rezultatin. Pra, në total janë 40 përfitues nga të gjitha njësitë administrative që marrin nga 2.6 deri në 3.4 milionë lekë për ta ribërë banesën e tyre. Shuma që jepet për secilin përllogaritet mbi preventivin e projekteve model të banesave që ka hartuar Bashkia, bazuar në përbërjen familjare dhe sipërfaqen e shtëpisë.
LAGJET E REJA Përveç banesave individuale, janë edhe 166 familje në pallatet e njësive administrative Baldushk, Ndroq, Pezë dhe Kombinat, banesat e të cilëve janë klasifikuar në nivel dëmi DS5. Edhe ato praktikisht janë përfituese nga granti i rindërtimit, por për këtë proces do të kujdeset Bashkia. Gjithë çfarë duhet të bëjnë banorët që gjejnë emrin në listat e mëposhtme është nënshkrimi i marrëveshjes paraprake për kalimin e të drejtës së pronësisë.