Naço dhe Braho kundër LSI, Presidenca: Turp që sulmoni Metën
Ish-deputeti i LSI-së, Nasip Naço, aktualisht kandidat i PS-së në qarkun e Beratit, tha dje se iku nga LSI-ja, sepse bënte eksperimente të dështuara, ndërsa sot me Ramën ai tha se ndihet me fat. “Jam larguar nga ajo forcë se vetëm eksperimente të dështuara bënte gjatë gjithë kohës. Deri dje na thoshin që Luli të gënjen edhe për orën, pastaj Lulin e duam Kryeministër, do rrëzojmë Ramën. Pastaj duhet të ikim nga Parlamenti të dorëzojmë mandatin. Pastaj s’do hymë për bashkitë, me dhjetëra dështime të suksesshme politike të asaj force. Jam me fat që jam me zotin Rama, e kam njohur kur isha ministër i Drejtësisë dhe më ka mbështetur më shumë se ata që më propozuan si ministër se Reforma në Drejtësi ishte kryefjala”, u shpreh Naço. Më i ashpër ishte deputeti Spartak Braho. “Më vjen keq ta them por na është çmendur ish-Kryeministri jonë i dikurshëm, Presidenti jonë i sotshëm. Filozofia e Ilir
Metës është bonapartizmi, puçizmi. I thashë një ditë në TV, ti nuk bën më, s’ke bërë asgjë për Skraparin megjithëse ke që nga mosha 30 vjeç, as për Çepanin s’ka bërë, sot atje shkohet vetëm me gomar. Do dalë do marrë pushkën Meta dhe mburret se si pasardhës i Çepanit që luftuan në luftën e Vlorës, është e vërtetë që ka pasur 6 mijë skraparllinj në luftën e Vlorës, por Meta nuk e njeh mirë historinë, s’ka pasur çetë Çepani, çeta ka qenë e gjithë Skraparit, Meta mund të krijojë vetëm çetë vagabondësh jo çetë patriotësh”, tha Braho në Skrapar. Por zëdhënësi i Presidentit, Tedi Blushi, iu përgjigj përmes një statusi në “Facebook”. “O Tak Çiçi, nuk të vjen turp, që sulmon Ilir Metën për llogari të Edi Ramës dhe të gjithë antishqiptarëve, nga Skrapari i patriotëve dhe i atdhetarëve? Ti as sorrë nuk e meriton të quhesh, se edhe sorra e ka një fije karakteri!”, shkruan Blushi.