“Askush nuk është mbi ligjin”, Yuri Kim reagon pas arrestimit të kryebashkiakut
Ambasadorja e SHBA: Pavarësisht sa të fuqishëm mendoni se jeni, është koha për të peshuar ndikimin e veprimeve tuaja
Ambasadorja e Shteteve të Bashkuara të Amerikës në vendin tonë ka mirëpritur rezultatet e Prokurorisë së Posaçme Antikorrupsion që çuan para drejtësisë kryebashkiakun e Lushnjës Fatos Tusha.
Kryediplomatja përmes një mesazhi në rrjetet sociale përçoi mesazhin se nuk ka më të pandëshkueshëm ndaj gjithsecili pavarësish pushtetit që ka duhet të peshojë veprimin që bën. “Nëse jeni të përfshirë në korrupsion, pavarësisht sa të fuqishëm mendoni se jeni, tani është koha për të peshuar ndikimin që veprimet tuaja do të kenë në familjen dhe vendin tuaj. Tani është koha për të gjykuar nëse ia vlen të shkosh në burg. Tani është koha për t’u ndalur. Askush nuk është mbi ligjin”, shkroi ambasadorja Kim në “Twitter”. Shtetet e Bashkuara të Amerikës janë investuesit më të mëdhenj në Reformën në Drejtësi, ndërsa ambasadorja Kim i ka kushtuar një vëmendje të veçantë faktit që institucionet e reja të drejtësisë të justifikojnë besimin duke goditur paligjshmërinë në çdo nivel.
PARALAJMËRIMI
Operacioni i ditës së djeshme që çoi para drejtësisë kryebashkiakun e Lushnjës dhe 10 zyrtarë të tjerë lokalë u paralajmërua vetëm dy ditë më parë nga kreu i SPAKut, Arben Kraja, teksa merrte pjesë në Konferencën Antikorrupsion të organizuar nga Ministria e Drejtësisë dhe ishin të pranishëm përfaqësues të BE-së e SHBA-së. Në fjalën e tij kreu i SPAK-ut u shpreh dy ditë më parë se institucioni që ai drejton është i vetëdijshëm se të gjithë presin rezultate për goditjen e paligjshmërive në nivele të larta zyrtarësh. Në këtë kuadër ai tha se puna ka ecur në atë drejtim dhe paralajmëroi se shumë shpejt do të kishte rezultate. “Kërkohet më shumë të kemi produkt në raport me evidentimin e shkeljeve në shpërdorimin e fondeve publike, qoftë në nivel lokal apo qendror. Kuptohet, bëhet fjalë për zyrtarë të përfshirë që në mënyrë abuzive shkelin ligjin. Kjo është përparësi jona pa diskutim që përditë e shpejt do kemi dhe rezultate konkrete që do i bëjmë publike, por me rëndësi është që struktura është e vendosur për qëllimin që është krijuar dhe ka vullnetin për të bashkëpunuar për ta realizuar qëllimin e përbashkët”, u shpreh Kraja. Kraja foli edhe për konfiskimin e pasurive që rrjedhin nga aktiviteti kriminal. “Në këtë aspekt, këtë vit kemi pasur disa raste edhe dënime të autorëve për pastrim të produkteve të veprës penale, është risi e përparësi që kemi vendosur e po mundohemi ta realizojmë”, tha Kraja. Ndërkohë një paralajmërim kreu i SPAK-ut e pati edhe për kolegët e tij, të cilët nuk i bashkohen ritmit për të ndëshkuar shkelësit e ligjit. Ai tha se tani duhet të ketë një vijë ndarëse mes atyre që duan të bëjnë punën siç duhet në organet e drejtësisë shqiptare dhe atyre që nuk do ta bëjnë këtë. “Jo se ne kemi pasur prioritet që të merremi me sistemin, por është mekanizëm që duhet ta bëjnë të gjithë, ndëshkueshmëria e tyre që s’kanë ushtruar detyrën duhet të jetë vijë ndarëse për të gjithë të tjerët që janë në sistem. Ose duhet të jemi të gjithë bashkë, ose ata që dalin kundër do marrin përgjegjësinë për atë që bëjnë”, tha ai.