Kuvendi tërheq vendimin për gazetarët, ndryshon rregulloren

Nga prezenca në komisionet parlamentare dhe lëvizja në hapësirat e brendshme, te përdorimi i telefonave dhe shoqërimi nga Garda

Byroja e Kuvendit miratoi dje ndryshimet në rregulloren për gazetarët dhe mediat pranë Kuvendit të Shqipërisë duke plotësuar kërkesat e gazetarëve. Kuvendi u tërhoq nga vendimi për të mos lejuar gazetarët të marrin pjesë në komisionet parlamentare.

Kjo vendimmarrje erdhi pas reagimeve të shumta të gazetarëve të terrenit, të cilët protestuan përpara Parlamentit, për të kundërshtuar rregulloren e re. Protesta bëri që Sekretari i Përgjithshëm i Kuvendit, Genc Gjonçaj të thërriste në një tryezë diskutimi gazetarët, ku u adresuan të gjitha kundërshtitë për rregulloren e re. Në shkresën e firmosur prej tij, Kryetari i Kuvendit pranoi të marrë në konsideratë kërkesën e gazetarëve për të qenë të pranishëm fizikisht në mbledhjet e komisioneve parlamentare, duke përdorur aty edhe aparatet celulare. Po ashtu, gazetarët nëpër korridoret e Kuvendit nuk do të jenë të shoqëruar nga Garda, një pikë tjetër kjo e rregullores së ndryshuar nga Byroja e Kuvendit në datën 2 qershor 2021, dhe sipas vendimit të ri, gazetari do të shoqërohet nga punonjësit e medias së Kuvendit, në rastet kur është e nevojshme. Sa i përket kërkesës së gazetarëve për të qenë të pranishëm në korridoret e Kuvendit për të kryer intervista me deputetë, kjo kërkesë është sugjeruar të merret pjesërisht në konsideratë, duke nënkuptuar se përveç se një ambienti në Kryesinë e Kuvendit të dedikuar për intervista, do të jetë edhe një ambient i jashtëm, i cili do të funksionojë si i tillë. Një vendim tjetër i Byrosë së Kuvendit, i konsideruar i nxituar, ishte ai që gazetarët duhet të njoftonin Zyrën e Shtypit të Kuvendit mbi çështjet që do të pyesnin në intervistë deputetët. Edhe prej këtij vendimi Kryetari i Kuvendit është tërhequr, duke pranuar kërkesën e gazetarëve, për të mos dhënë asnjë informacion për çështjet që do të diskutojnë me të intervistuarit. Për sa u përket kamerave, ato do të jenë në këto mbledhje vetëm 5 minuta, për të marrë pamje dhe diskutimet e plota nëpër komisione, do të merren nga teknologjia që ofron Kryesia e Kuvendit. Zgjidhja e këtij debati mes Kuvendit dhe gazetarëve erdhi pasi për herë të parë të dyja palët u ulën në një tryezë dhe diskutuan për më të mirën e transparencës. Kujtojmë që protesta e gazetarëve u mbështet edhe nga organizmat ndërkombëtarë, të cilat i konsideruan të drejta shqetësimet e tyre për pengim të punës së tyre dhe mungesë të transparencës, duke kërkuar zgjidhjen e kërkesave të gazetarëve.