“Është mirë t’ia dërgosh dhuratën”, burg për mjekët
Akuzohen se morën para për operacionin e të plagosurit në Velipojë
“Arrest me burg” ka dhënë Gjykata e Shkallës së Parë në Shkodër për dy mjekët Ervin Sulaj dhe Serdi Memini, si dhe infermieren nga Shkodra, Diellë Macaj. Ndërkohë, për shtetasin Fatbardh Dyli, babai i të riut të plagosur pas përplasjes me armë në Velipojë, Elmedin Dyli, gjykata dha masën e sigurisë “Detyrim paraqitje”, duke e liruar atë nga qelitë e paraburgimit. Kjo masë u mor me kërkesë të Prokurorisë së Shkodrës. Dy mjekët dhe infermierja janë të dyshuar për veprën penale “Korrupsion pasiv i personave që ushtrojnë funksione publike”. Ndërkohë, Gjykata e Shkallës së Parë në Shkodër rrëzoi kërkesën e Prokurorisë që kjo dosje t’i kalojë SPAK-ut për hetim të mëtejshëm. Në njoftimin për mediat, Policia tha se ndalimi i tyre u bë për arsye se në ambientet e një qendre spitalore në Tiranë, pas një operacioni mjekësor që kirurgu Serdi Memini dhe anestezisti Ervin Sulaj i kanë bërë shtetasit Elmedin Dyli, i plagosur mbrëmjen e datës 27 qershor në Velipojë, i ati i pacientit, shtetasi Fatbardh Dyli, dyshohet se iu ka dhënë të dy mjekëve një sasi parash për kryerjen e operacionit. Pas kontrolleve të ushtruara, shërbimet e Policisë kanë gjetur dhe sekuestruar në cilësinë e provës materiale shumën 377 mijë lekë të rinj dhe 55 euro. Gjatë seancës gjyqësore, mjeku Ervin Sulaj, i cili ka qenë i pranishëm në sallë, ka mohuar se ka lidhje me marrje ryshfeti duke thënë se ai dhe kolegu i tij janë marrë vetëm me operacionin e të plagosurit Elmedin Dyli. Ndërkohë, mjeku tjetër kirurg, Serdi Memini, nuk ka qenë i pranishëm në sallë për shkak se është i shtruar në spital në Tiranë, duke u përfaqësuar nga avokati i tij. Avokatët mbrojtës të dy mjekëve kërkuan që ndaj të dyshuarve të mos caktohet asnjë masë sigurimi dhe madje të cilësohet i paligjshëm arrestimi i tyre, por gjykata nuk e pranoi këtë kërkesë, duke i lënë me masën e sigurisë “Arrest me burg”. Ka qenë bashkëshortja e shtetasit Fatbardh Dyli ajo e cila ka zhvilluar një bisedë telefonike me infermieren në Shkodër, Diellë Macaj, duke i thënë asaj se do t’i çojnë dhuratë 500 mijë lekë të vjetër doktorit, por pa përmendur emrin se cilit prej tyre. Infermierja e ka mbështetur në atë bisedë duke i thënë se: “Është mirë t’ia dërgosh dhuratën”. Kaq ka mjaftuar që Policia, e cila kishte në përgjim familjen Dyli pas ngjarjes së rëndë në Velipojë me 27 qershor me katër të vrarë e dy të plagosur, përfshirë edhe djalin e tyre 17vjeçar Elmidin Dyli, për të bërë arrestimin e dy mjekëve kirurgë të Spitalit të Traumës në Tiranë, infermieres nga Shkodra Diellë Macaj që është e njohur e familjes Dyli, si dhe babait Fatbardh Dyli, i cili u lirua me masën “Detyrim paraqitje” për shkak se nuk rezulton të ketë element të veprës penale.