LISTA NE TIRANE Legalizimet, emrat e rinj që marrin tapinë
Kadastra miraton emrat e rinj të familjeve që marrin tapinë për shtëpitë e ndërtuara pa leje. Gazeta boton listën me përfituesit e lejes së legalizimit dhe afatet për dokumentet
Agjencia e Kadastrës Tirana Rurale 1 ka publikuar një ditë më parë emrat e familjeve që kanë gati lejen e legalizimit.
Gazeta boton sot të plotë listën me emrat e përfituesve, për të cilët ka përfunduar shqyrtimi i dosjes dhe pas 30 ditësh nis edhe praktika e regjistrimit. Në këtë mënyrë, qytetarët që kanë emrin në listë duhet të paraqiten në sportelet e agjencisë për të tërhequr lejen e legalizimit dhe pas një muaji të aplikojnë për pajisjen me certifikatën e pronësisë. Aplikimet, siç edhe është bërë më herët e ditur nga Kadastra, mund të bëhen online përmes portalit qeveritar e-Albania.
REGJISTRIMI
Praktika e regjistrimit përcaktohet në ligj duhet të përmbyllet brenda 60 ditëve nga momenti i aplikimit. Ndërsa, për ata të cilët duan të shkurtojnë kohën e pritjes, për një arsye apo për një tjetër mund të aplikojnë për trajtim të përshpejtuar. Kjo ju jep mundësinë ta marrin tapinë brenda 30 ditëve, përkundrejt një tarife shtesë, e cila ende nuk është e përcaktuar sesa do të jetë.
LEGALIZIMET
Në pjesën më të madhe të zonave informale, procesi i legalizimit ka përfunduar. Por çfarë kanë mbetur ende janë ndërtimet e ngritura brenda perimetrit të zonave urbane. Procesi për këtë kategori është më kompleks për shkak edhe të problematikave që mbartin. Ndaj, edhe sikundër është paralajmëruar, formalizimi i tyre do të marrë më tepër kohë. Ndërkohë që nuk janë pak edhe banesat e skeduara "në shkelje të ligjit". Janë mbi 90 mijë ndërtime, të cilat s'mund të legalizohen, për pasojë në ligj është parashikuar përfshirja e këtyre familjeve në një nga programet e strehimit, si e vetmja mënyrë kjo për të mos i lënë në qiell të hapur.