Shqipëria në KS të OKB, Rama: Standard besueshmërie

Kryeministri: Ky është suksesi më i madh për nga përmasat e impaktit në historinë e diplomacisë shqiptare

Kryeministri Edi Rama dha një mesazh në ceremoninë e pritjes zyrtare të mandatit të fituar të Shqipërisë në Këshillim e Sigurimit, duke thënë se ky është suksesi më i madh për nga përmasat e impaktit në historinë e diplomacisë shqiptare.

Sipas kreut të qeverisë shqiptare, zgjedhja e Shqipërisë si anëtare e përkohshme në Këshillin e Sigurimit të OKBsë është një arritje domethënëse edhe për Ballkanin Perëndimor, që është ulur në tryezën e përfaqësueses më të madhe në botë vetëm një herë. “Zgjedhja për herë të parë e Shqipërisë si anëtare e përkohshme në Këshillin e Sigurimit të Kombeve të Bashkuara është jo thjesht një sukses i madh, më i madhi për nga përmasat e impaktit në historinë e diplomacisë shqiptare, por edhe një arsye për të kuptuar se Shqipëria mund dhe duhet të bëjë më shumë për veten dhe për tjerët, sidomos për rajonin tonë. Në vendimin e 11 qershorit, në asamblenë e përgjithshme domethënia më e madhe ishte marrja e besimit nga 175 vende. Kjo e Shqipërisë është një arritje domethënëse edhe për Ballkanin Perëndimor, që është ulur në tryezën e përfaqësueses më të madhe në botë vetëm një herë. Pas kryesimit të OSBE-së, ku lamë një përshtypje të mirë, them se ulja jonë në Këshillin e Sigurimit të OKB-së rikonfirmon një standard besueshmërie dhe maturie për Shqipërinë”, tha Rama. Nuk munguan edhe në këtë ceremoni kritikat e Kryeministrit për BE-në. “Sot, Ballkani nuk do të ishte i ndarë, deri dhe për vaksinat kundër vdekjes, nga BE, edhe pse jeton fizikisht i rrethuar nga kufijtë e BE, megjithatë në asnjë mënyrë nuk duhet mohuar se është shumë më mirë të jesh i rrethuar nga kufijtë e BE-së sesa nga telat me gjemba, brenda të cilëve ishte i izoluar ky vend, kur u anëtarësua nga Kombet e Bashkuara dhe u deshën tri dekada për të parë nga vetja aftësinë e të qenit të barabartë në tryezat ndërkombëtare”, tha Kryeministri Rama. Në ceremoninë e pritjes zyrtare të mandatit të fituar të Shqipërisë në Këshillim e Sigurimit, ministrja e Jashtme, Olta Xhaçka, tha se ky mandat është një fitore për të gjithë shqiptarët. Ajo tregoi sfidat që e presin Shqipërinë në këtë rrugë, e theksoi, se edhe vendet e fuqishme botërore kanë gjëra për të mësuar nga Shqipëria. Ajo renditi këtu harmoninë fetare, integrimin e grave dhe femrave në institucione dhe respekti që na karakterizon. Gjithashtu, Xhaçka ia atribuoi këtë arritje Kryeministrit Rama, duke thënë se pa këmbënguljen e tij, kjo gjë nuk do të mund të realizohej. “Është një arritje, për të cilën është punuar shumë, për thuajse një dekadë”, tha Xhaçka.