KPK shkarkon nga detyra Zegjine Sollakun
Çifti Sollaku ka në pronësi 8 apartamente, disa garazhe e dy makina
Komisioni i Pavarur i Kualifikimit ka shkarkuar nga detyra gjyqtaren e Gjykatës së Apelit në Tiranë, Zegjine Sollaku. KPK ka dhënë dje vendimin për gjyqtaren e Apelit, ndërsa kjo e fundit nuk ishte e pranishme në seancë. Gjatë seancës dëgjimore u evidentuan pasaktësi në deklarime dhe mungesa burimesh financiare në vlerën totale 7 milionë lekë. Sipas raportit të Komisionit, bashkëshortët Zegjine dhe Theodhori Sollaku kanë në pronësi 8 apartamente, te verifikuara nga hetimi administrativ, disa garazhe, si dhe dy makina. Hetimi administrativ për Zegjine Sollakun u krye nga trupa gjykuese që kryesohet nga Xhensila Pine, me relator Lulzim Hamitajn dhe anëtare Suela Zhegun. Në cilësinë e vëzhguesit ndërkombëtar ishte i pranishëm Francesco Ciardi. Gjyqtarja Sollaku mbrohej nga bashkëshorti i saj, ish-Prokurori i Përgjithshëm, Theodhori Sollaku, i cili në cilësinë e avokatit, gjatë seancës dëgjimore kundërshtoi gjetjen e komisionit. Ai tha se sikurse ka rezultuar edhe nga hetimi administrativ, të gjitha transaksionet financiare janë kryer nga ana e tij, ndërsa shtoi se e shoqja gjyqtare kishte qenë gjithmonë e fokusuar te detyra. Në seancën dëgjimore publike të datës 1 korrik, gjyqtarja u vlerësua pozitivisht për dy kritere të vlerësimit, si për pastërtinë e figurës, si dhe nuk u evidentuan probleme për kriterin e profesionalizmit. Duke u bazuar në deklarimet e bëra, KPK mori vendim për shkarkimin e gjyqtares Sollaku vetëm për shkak të mosjustifikimit të pasurisë. Në raportin e Komisionit të Pavarur të Kualifikimit thuhet se nuk janë gjetur indicie edhe në 58 denoncimet e kryera nga publiku, ku 20 prej tyre kanë qenë të përsëritua dhe të depozituara nga i njëjti person. DISKUTIMET PËR
PASURINË Avokati Theodhori Sollaku këmbënguli se ai kishte vërtetuar edhe punësimin si këshilltar i jashtëm në një bankë, duke pretenduar se për periudhën 19962001 ishte paguar me 200 mijë dhrahmi në muaj. Gjithashtu, ai kërkoi që të merreshin në konsideratë edhe pagesat në tri universitete private. Për një apartament me sipërfaqe 195 m2 + garazh 22 m2 në Tiranë në vitin 2003 është deklaruar pagesa e shumës 60 mijë euro. Si burim për këtë pagesë janë deklaruar një kredi në shumën 25 mijë USD dhe 35 mijë euro kursime. Sollaku e kundërshtoi edhe gjetjen tjetër të Komisionit se vlera e shitjes së një trualli në Golem në vitin 2007 kundrejt çmimit 127 mijë euro, i deklaruar si burim për blerjen e një apartamenti 140 m2 + një garazh, ishte disa herë më i madh se çmimi i blerjes prej 10 mijë USD në vitin 2000. Hamitaj tha se mungesë burimesh është konstatuar edhe për blerjen e dy apartamenteve dhe tri garazheve në vitin 2010 kundrejt shumës 300 mijë euro. Sipas relatorit, subjekti ka deklaruar si burime dy kredi, një në shumën 200 mijë euro dhe tjetrën në vlerën 139 mijë euro. Komisioni konstaton se subjekti nuk ka specifikuar në deklarime një hua në shumën 100 mijë euro të marrë në vitin 2010, që ka shërbyer për pagesën e një pjese të vlerës së këtyre pasurive. Nga analiza financiare paraprake ka rezultuar pamundësi në shumën 1.7 milionë lekë për një apartament me sipërfaqe 70 m2 në Kavajë të porositur në vitin 2009 me vlerën 3 milionë lekë. Po ashtu, është konstatuar pamundësi në shumën 2.6 milionë lekë për pagesën e vlerës 30 mijë euro për një apartament + verandë në vitin 2013.