Vokshi: SPAK të hetojë kryetaren e re të AMA, shpërdoroi detyrën

Një ditë pasi u zgjodh në krye të Autoritetit të Mediave Audiovizive, Partia Demokratike kërkon që Prokuroria e Posaçme Antikorrupsion të hetojë Armela Krasniqin për shpërdorim detyre. Deputetja e zgjedhur e PD-së Albana Vokshi deklaroi nga selia blu se gjatë zgjedhjeve PD ka paditur për shpërdorim detyre Armela Krasniqin gjatë kohës që ajo mbante postin e drejtoreshës së Agjencisë Telegrafike Shqiptare. Sipas Vokshit, gjatë zgjedhjeve, ATSH, që është një institucion që paguhet nga taksat e shqiptarëve, u bë përçuesi i propagandës së partisë në pushtet. Pikërisht kjo ishte edhe arsyeja që PD e paditi për shpërdorim detyre. “Partia Demokratike i kërkon SPAK-ut të mos heshtë për këtë rast. Të nxjerrë dosjen nga sirtari, ku qëndron prej gati 4 muajsh, dhe ta hetojë militanten e Edi Ramës! Ky do të jetë një kontribut real jo vetëm për zgjedhjet, por edhe për lirinë e medias, duke e çliruar Autoritetin e Medias Audiovizive nga militantët e paaftë dhe kamikazë të Kryeministrit. Pas masakrës elektorale të 25 prillit perdja e falsitetit të Edi Ramës me shqiptarët, me opozitën dhe me partnerët europianë ka rënë”, tha Vokshi. Ndërkohë Kryeministrin Rama deputetja e PD-së e akuzon se është armik i fjalës së lirë. Sipas saj, edhe në seancën e fundit Kryeministri Rama tregoi se nuk e ka prioritet Shqipërinë para pushtetit personal teksa injoroi BE-në dhe OSBE-në për të vendosur në krye të institucionit që jep licencat për mediat ishzëdhënësen e PS-së. “Kryeministri i Shqipërisë u provua sërish si armiku më i madh i fjalës së lirë dhe i medias së pavarur. Siç paralajmëroi edhe organizata më e madhe e gazetarëve “Reporterët pa kufij”, gjendja e lirisë së medias në Shqipëri do të vazhdojë të përkeqësohet dhe, bashkë me të, do të dobësohen mundësitë për ecjen shpejt përpara me integrimin europian”, vijoi Vokshi.