Kim: Korrupsioni po luftohet, investimet po rriten
“E domosdoshme që rregullat të jenë të njëjta e gjykatat të pastra”
Ambasadorja amerikane, Yuri Kim, deklaroi se investimet po rriten, ndërsa korrupsioni po luftohet. Përmes një mesazhi në “Twitter”, Kim ka folur mbi investimet që po arrihen mes Shqipërisë dhe Shteteve të Bashkuara. Ambasadorja Kim theksoi se është e domosdoshme që rregullat të jenë të njëjta për të gjithë, e mbi të gjitha, të kemi në vend gjykata të pastra në rast mosmarrëveshjesh. Reagimi i ambasadores Kim vjen pasi Dhoma Amerikane publikoi “Axhendën e investimeve”, raportin me 40 rekomandime për përmirësimin e klimës së biznesit dhe letrës së Presidentit të “AmCham”, Enio Jaço, drejtuar bizneseve të “AmCham” për rëndësinë e implementimit të rekomandimeve. Dy ditë më parë, ambasadorja Kim e konsideroi një marrëveshje domethënëse atë për hidrocentralin e Skavicës, mes kompanisë amerikane “Bechtel” dhe KESH. Përmes një mesazhi në “Twitter”, ambasadorja e SHBA-së ka shkruar se “marrëveshja për hidrocentralin Skavica është domethënëse për shumë arsye: shënon një përparim të ri në bërjen biznes mes Shqipërisë dhe SHBA-së; do të rrisë furnizimin me energji për ekonominë në rritje të Shqipërisë; do ta pozicionojë Shqipërinë në një vend eksportues neto të energjisë, diversifikimit dhe sigurisë në rajon”. MESAZHI I YURI KIM “Duke pritur për më shumë punë me Shqipërinë dhe autoritetet e Dhomës Amerikane të Tregtisë në Shqipëri për të rritur investimet amerikane në Shqipëri. Esenciale për të pasur rregulla të qarta që zbatohen për të gjithë, gjykata të pastra në rast mosmarrëveshjesh, të drejta të besueshme pronësie, transparencë në prokurimin publik. Tetorin e kaluar ne vendosëm kuadrin për një bashkëpunim më të madh ekonomik mes SHBA-së dhe Shqipërisë. Investimet amerikane do të rriten, ndërsa korrupsioni dhe pengesat e tjera do të hiqen. Shqipëria ka një potencial të jashtëzakonshëm ekonomik që duhet vlerësuar dhe zhvilluar plotësisht”.