Tokat me 7501, skema e re për të marrë tapinë

Lehtësohet sërish skema e regjistrimit të tokave të ndara me ligjin 7501. Çfarë ndodh me familjet që kanë qenë banuese në fshat dhe ata që kanë aktin e AMTP. Kushtet për të marrë tapinë

Me ndryshimin e bazës ligjore, kanë ndryshuar kriteret si edhe rregullat për regjistrimin e tokës bujqësore të ndarë me ligjin 7501.

KRITERET Kështu, nuk shqyrtohet më sipërfaqja e përfituar me AMTP në raport me sipërfaqen takuese sipas normës për frymë, pasi me ligjin e ri mund të përfitohet deri në 20 për qind më shumë të sipërfaqes së caktuar. Nga ana tjetër, po ashtu, në kategorinë e AMTP-ve të regjistrueshme, janë shtuar edhe AMTP që janë lëshuar për personat që u është hequr e drejta e pronësisë me krijimin e ish-kooperativave bujqësore apo ish-ndërmarrjeve bujqësore ose trashëgimtarët e tyre. Sakaq, lëshime ka edhe për llojin e pasurisë. Aktualisht, llojet e tokës së përfituar, për të cilat nuk regjistrohet AMTP-ja mbeten vetëm: truall; vepër e infrastrukturës publike; rërë bregdetare, plazh. Pra, është hapur rruga për regjistrimet e llojeve deri dje të përjashtuara apo të lëna jashtë procesit si kullota, livadhe etj. Kujtojmë që veç familjeve që nuk kanë asnjë dokument për tokën bujqësore që kanë në përdorim, në skemë janë edhe familjet, të cilat kanë Aktin e Marrjes së Tokës në Përdorim, por pasuria e tyre nuk është regjistruar. Në këto rrethana gjenden jo pak, por 250 mijë familje. Për regjistrimin e kësaj prone mjafton vetëm që familjet, të cilat janë në proces, të jenë banorë të fshatit, të kenë AMTP si edhe paraqitjen grafike të pronës së tyre. REGJISTRIMI Nga ana tjetër, mungesa e elementeve të formës nuk pengon regjistrimin, por me kushtin që nga dokumentacioni i administruar sipas këtij vendimi, për ndarjen e tokës bujqësore, ose nga dokumentacioni që paraqitet si provë gjatë shqyrtimit administrativ, të vërtetohet se i është dhënë tokë bujqësore në pronësi. Një gjë e tillë përcaktohet në vendimin e Qeverisë “Për procedurat e regjistrimit të AMTP-vë, saktësimin e kufijve e sipërfaqeve, si dhe normat për sipërfaqet shtetërore shtesë e pronat shërbyese”. Çka do të thotë se mungesa e një të dhëne apo informacioni për tokën apo për familjen përfituese, nuk do të penalizojë këtë të fundit për të marrë tapinë. Të rregullta sipas vendimit do të konsiderohen edhe AMTP-të e korrigjuara në elementet formale apo të përmbajtjes, nëse ky korrigjim është konfirmuar nëpërmjet firmës dhe vulës së ish-komunës për korrigjimin. Në rastin kur ky konfirmim mungon, ASHK-ja kontrollon dokumentacionin e ndarjes së tokës, me qëllim saktësimin e elementit të korrigjuar. Ndërkohë, fermerët që kanë përfituar abuzivisht tokën me 7501-n, do të detyrohen ta kthejnë atë. Kjo sipërfaqe do të përdoret më tej për kompensimin e pronarëve. Ligji parashikon po ashtu që në rastet kur prona është shitur, atëherë ajo familje do të duhet ta paguajë me çmimin e tregut.