Një thirrje miqve e kolegëve të kryesisë

Shoh se edhe mes de putetëve demokratë...

të (ri)zgjedhur në 25 prill ka ende debat ose të paktën opinione të kundërta mbi dy vendime të rëndësishme të Partisë Demokratike në pranverë 2019: djegia e mandateve dhe bojkoti i lokaleve (më tej djegia dhe bojkoti). Këto dy vendime, sipas një analize aritmetike, i hoqën opozitës afro 8 mandate deputetësh, me të cilat ajo do të mund të kishte realizuar rrotacionin politik me një maxhorancë të ngushtë në Kuvend. Siç ndodhi edhe në Mal të Zi në gusht 2020. Disa studiues të tjerë konkludojnë se pa djegien dhe bojkotin, opozita do të kishte marrë më shumë se 8 mandate shtesë.

a- Ata që ende e justifikojnë djegien dhe bojkotin, përmendin demoralizimin e popullit opozitar në fillim të vitit 2019. Pa debatuar për matjen, shkaqet e menaxhimin e demoralizimit të elektoratit tënd, por duke e marrë të mirëqenë argumentin se djegia dhe bojkoti e entuziazmoi popullin opozitar deri në verë 2019, lipset që ata të përgjigjen edhe për shkallën e demoralizimit të këtij populli në vjeshtë e dimër të po atij viti, mbasi u pa se nuk u arrit as ndryshimi i pushtetit e as ndonjë koncesion domethënës prej tij. Pa llogaritur këtu segmentin jopartiak të opinionit/elektoratit që shpesh është vendimtar në zgjedhje e që nga sondazhet rezultonte skeptik e kritik ndaj djegies dhe bojkotit.

b- Ata që thonë se bojkoti evitoi “masakrën elektorale” të lokaleve në 2019, a mos janë inkonsistentë kur ankohen për të njëjtën gjë mbas 25 prillit 2021? Si dhe kur pranojnë mandatet parlamentare mbasi refuzuan ato bashkiake?

c-Ata që thonë se duke marrë një masë drastike u ndërgjegjësua komuniteti ndërkombëtar për problemet e rënda të demokracisë shqiptare mund të kenë drejtë, por po thonë një pjesë të së vërtetës. Pjesa tjetër më e madhe e së vërtetës është se komuniteti ndërkombëtar druajti se mos akti i paprecedent i djegies së mandateve bëhej ortek destabilizues në demokracitë e brishta të Ballkanit e më gjerë. Dhe kjo për ta ishte ku e ku më e rëndësishme se hallet e opozitës shqiptare apo edhe të vetë Shqipërisë. Prandaj edhe disa prej ndërkombëtarëve në Tiranë u bënë edhe më të paturpshëm në avokatinë e regjimit.

d-Kush thotë se nuk mund të rrinim më në Kuvend sepse aty opozita nuk gëzonte të tërë të drejtat parlamentare, thotë një të vërtetë të pjesshme si dhe një konkluzion të pasinqertë.

e-Gjithsesi, justifikuesit duhet të dinë se motivet e synimi kanë rëndësi, por se rezultati e pasoja janë përcaktuese në politikë, ashtu si dhe në çdo aspekt të jetës. Dhe në rastin e djegies dhe bojkotit, këto të fundit rezultuan një katastrofë për Partinë Demokratike.

Për mendimin tim, opozita në vitin 2021 duhet të qartësojë qëndrimin a saj lidhur me dy vendimet e veta të vitit 2019. Në radhë të parë për motive parimore etikopolitike, mbasi qartësia në çështje madhore të forcon besimin e atyre që të votuan dje e që të përkrahin sot; si dhe fiton besimin e atyre që mund të të votojnë nesër.

Në radhë të dytë për arsye taktike: shtatori do të nisë me sfida e përballje dhe opozita parlamentare është në situatë më të vështirë se në tetë vjetët e shkuara. Gjithashtu, ajo ka përballë një makinë propagandistike të specializuar për të shpjeguar dështimet e qeverisë si probleme të opozitës. Është e jo e duhur t’i ofrosh asaj një problem që opozita ende e ka nëpër këmbë.

Unë, për veten time, zgjodha që pas 25 prillit të analizoja e konkludoja publikisht se djegia dhe bojkoti ishin gabime fatale për Partinë Demokratike; gjithashtu për votën time pro këtyre vendimeve në Grupin Parlamentar e në Këshillin Kombëtar zgjodha që me përunjësi të kërkoja ndjesën a atyre që më kishin votuar në këto dy forume. Nuk m’u duk me vend që të kritikoja ata që votuan si unë apo edhe atë që bëri beftas propozimet në fjalë.

Mbas pak ditësh mblidhen forumet drejtuese të PD-së. Ata do të analizojnë fushatën e zgjedhjet e 25 prillit, do të shpjegojnë rezultatin a tyre dhe do të dalin me konkluzione e plane veprimi për më tej. Jam besimplotë se ndërsa do të analizojnë probleme si p.sh. vonesa në emërimin e drejtuesve politikë të fushatës apo të kandidatëve në listë, nuk mund të lenë jashtë vëmendjes kryeproblemin “djegie dhe bojkot”. Por do t’u propozoja që, krahas një kërkesëfalje për gabimin, të konkludojnë se partia kurrë më nuk do të futet në ujëra të tilla.

Mbas pak ditësh mblidhen forumet drejtuese të PD-së. Ata do të analizojnë fushatën e zgjedhjet e 25 prillit, do të shpjegojnë rezultatin a tyre dhe do të dalin me konkluzione e plane veprimi për më tej. Jam besimplotë se ndërsa do të analizojnë probleme si p.sh. vonesa në emërimin e drejtuesve politikë të fushatës apo të kandidatëve në listë, nuk mund të lenë jashtë vëmendjes kryeproblemin “djegie dhe bojkot”. Por do t’u propozoja që, krahas një kërkesëfalje për gabimin, të konkludojnë se partia kurrë më nuk do të futet në ujëra të tilla

*Anëtar i Këshillit Kombëtar të Partisë Demokratike *Ish-ministër e deputet