Basha e Majko mbështesin opozitën iraniane për liri
Kreu i PD: “Mbështesim popullin iranian për një vend demokratik e jobërthamor”. Ministri: “I lumtur që jam pranë jush”
Mbahet në kampin “Ashraf 3” në Manzë samiti treditor botëror “Për Iranin e Lirë 2021”, ku marrin pjesë anëtarë dhe mbështetës të rezistencës iraniane nga mbi 50,000 lokacione në 105 shtete.
Të pranishëm dhe në mbështetje të opozitës iraniane ishin kryetari i Partisë Demokratike, Lulzim Basha, ministri Pandeli Majko, ish-Sekretari amerikan i Shtetit, Mike Pompeo, si dhe dhjetëra senatorë të lartë amerikanë. Gjatë fjalës së tij, Basha shprehu mbështetje për popullin iranian dhe qëllimin e tij për një Iran demokratik e jobërthamor. “Partia Demokratike e Shqipërisë e ka shprehur qartë pozicionin e saj. Ne kemi një pozicion të fortë kundër tentativave të regjimit iranian për veprime të paligjshme e terroriste në tokën tonë, si dhe kundër përpjekjes së tij të strukturuar për eksportimin e fundamentalizmit në Shqipëri dhe në rajonin tonë. Ne mbështesim popullin iranian dhe qëllimin e tij për një Iran demokratik e jobërthamor. Ne mbështesim dëshirën e popullit iranian për ndryshim dhe e vlerësojmë zonjën Rajavi dhe përpjekjet e saj për t’i ofruar popullit të Iranit perspektivën e një vendi të lirë, laik dhe demokratik”, tha kryedemokrati Basha në samit. Gjatë fjalës së tij, ministri Pandeli Majko tha se është i lumtur që është përkrah njerëzve që duan të jenë pjesë e së ardhmes së Iranit, për të cilin tha se ka shpresë të marrë atë që meriton në botë. “Populli iranian e bojkotoi farsën e zgjedhjeve presidenciale. Raisi akuzohet për krime kundër njerëzimit nga organizata ndërkombëtare të të drejtave njerëzore dhe tani zgjidhet President. Jam i lumtur që sot u qëndroj përkrah njerëzve që duan të jenë pjesë e së ardhmes së Iranit. Me Maryam Rajavin ka shpresë që Irani do të marrë vendin që meriton në botë”, tha Majko. Mike Pompeo, Sekretari amerikan i Shtetit deri në vitin 2021, u shpreh se duhet ta mbështesim popullin iranian me çdo mënyrë të mundshme në luftën e tij për një Iran më të lirë e më demokratik, pasi diktatura fetare është në pikën më të brishtë që nga viti 1979. “Diktatura fetare është në pikën më të brishtë të saj që nga viti 1979 dhe perspektiva e saj për mbijetesë po vihet në dyshim haptazi nga zyrtarë të brendshëm të regjimit dhe nga njerëzit e pakënaqur e liridashësit. Duhet ta mbështesim popullin iranian me çdo mënyrë të mundshme në luftën e tij për një Iran më të lirë e më demokratik. Në fund populli iranian do të ketë një republikë laike, demokratike dhe jobërthamore”, tha Pompeo. Në fjalimin e saj ditën e parë të samitit, Maryam Rajavi, Presidentja e zgjedhur e Këshillit Kombëtar të Rezistencës së Iranit (NCRI), tha se lufta e opozitës bëhet për tri qëllime: liri, demokraci dhe barazi. Ajo tha se tha se emërimi si President nga Khamenei i EbrahimRaisi-t, njërit prej autorëve të masakrës së 1988-ës ndaj 30,000 të burgosurve politikë, ka shënuar disfatën dhe turpin më të madh në historinë e regjimit klerikal. Vetëm frika e regjimit nga kryengritjet dhe disfata politike e liderit suprem mund ta shpjegojë ngritjen e
Raisi-t, ekzekutuesit të masakrës së 1988-ës, në këtë post të lartë. “Vullneti ynë dhe i popullit tonë mund të përmblidhet në këto tri fjalë: liri, demokraci dhe barazi. Për sa i përket komunitetit ndërkombëtar, i kërkojmë që ta njohë përpjekjen e popullit iranian për ta përmbysur këtë regjim dhe t’i njohë këto tri koncepte. Duam të sjellim përpara drejtësisë liderin suprem të mullahëve, Ali Khamenei, Presidentin e tij, Ebrahim Raisi, kryegjyqtarin Gholam-Hossein Mohseni Eje’i dhe zyrtarët e tjerë përgjegjës për masakrën e 1988ës, me akuzën e krimeve kundër njerëzimit dhe gjenocidit”, tha Rajavi përpara të pranishmëve në samit, që përkon me 32-vjetorin e masakrës.