Klement Balili “fiton” betejën, ikën nga Burgu i Sigurisë së Lartë të Peqinit
Pas një beteje gati njëvjeçare me drejtësinë, Klement Balili, i dënuar me 10 vite burg për trafik droge, ka arritur të ndryshojë vendin e vuajtjes së dënimit. Kështu, gjyqtarja e Elbasanit Pajtime Fetahu ka vendosur më 9 korrik të këtij viti që Balili të kryejë dënimin në një burg të sigurisë së zakonshme dhe jo në Burgun e Peqinit, ku ka qëndruar deri më tani. Shkak i këtij vendimi janë bërë problemet e tij shëndetësore. Në këtë mënyrë, Balili do ta ketë më të lehtë të zhvillojë takime me mjekët, si dhe me familjarët. Gjyqtarja e ka marrë një vendim të tillë bazuar në ekspertizën shëndetësore të ekspertëve. Vendimi është aprovuar edhe nga Prokuroria e Elbasanit, e cila pa pranuar aktet e ekspertimit të mjekëve. Më 17 shkurt të këtij viti Balili ka bërë një tjetër kërkesë për lirim nga qelitë për shkak të gjendjes shëndetësore, ndërsa në korrik të vitit të shkuar ai iu drejtua Gjykatës për kryerjen e dënimit në një burg të zakonshëm. Më 16 korrik të vitit 2016, Policia bllokoi gjatë rrugës për në Greqi 750 kg kanabis sativa, duke arrestuar 4 persona, tre ishin punonjës Policie dhe tjetri ishte Klement Balili, i njohur si një nga pronarët e një kompleksi turistik në Butrint. Arrestimi u krye në rrugën Muzinë–Delvinë, rreth orës 14:00. Operacionin e kishte nisur Shërbimi i Kontrollit të Brendshëm në atë kohë, pasi ishin të përfshirë edhe 3 punonjësit e Policisë. Përveç sasisë së konsiderueshme të drogës që u kap, Balili dhe të tjerët u akuzuan edhe për trafikimin e disa ngarkesave të tjera me mjete lundruese në drejtim të Korfuzit. Veprimtaria e tyre dyshohej të kishte filluar që prej vitit 2005. Balili, që atëherë ishte 34 vjeç, dyshohej si një nga organizatorët e nisjes me skaf të sasive të ndryshme të drogës drejt Greqisë. Nga hetimet që u kryen nga Prokuroria e Krimeve të Renda dhe SHKB dyshohej se këta persona kishin 3 vjet që merreshin me trafikimin e lëndëve narkotike. Më 20 korrik 2006 biznesmeni Klement Balili gjatë seancës së masës së sigurisë në Gjykatën e Krimeve të Rënda ofroi garanci pasurore kundrejt lirisë së tij. Megjithatë, garancia nuk u pranua nga Gjykata, e cila vendosi ta lërë në burg, bashkë me 3 policët. Gjatë seancës Balili dhe dy nga policët nuk e pranuan akuzën e trafikimit të lëndëve narkotike të ngritur nga Prokuroria. Prokurori i çështjes, duke i kërkuar Gjykatës që të deklaronte të ligjshëm arrestimin e 4 të dyshuarve, shprehej se: “Në momentin e arrestimit këtyre personave u është sekuestruar një furgon me targa gjermane, brenda të cilit ishin fshehur 26 çanta të mbushura me 750 pako një kilogramëshe kanabis sativa, gjysmë i gatshëm, i presuar dhe i ambalazhuar”.