Pikëpyetje të tjera për vaksinën ruse “Sputnik”

Prodhuesit nuk kanë pranuar të japin informacion

Në mbarë botën po bëhen përpjekje për të vaksinuar sa më shumë njerëz për të arritur imunitetin e turmës kundër koronavirusit. Zyrtarët thonë se po analizojnë efektshmërinë e vaksinave, por sipas ekspertëve, Rusia nuk ka ofruar deri tani informacionin e nevojshëm mbi vaksinën e saj, “Sputnik V”. Në maj, një grup shkencëtarësh ndërkombëtarë, shkruan “Zëri Amerikës”, botuan një letër të hapur në revistën mjekësore “The Lancet” ku shprehnin shqetësim për vaksinën ruse “Sputnik V”. Shkencëtarë amerikanë, holandezë, francezë, italianë dhe rusë kanë cituar mospërputhje mes të dhënave nga Instituti Kërkimor “Gamaleya”, prodhuesi i vaksinës ruse “Sputnik V”. Më saktësisht, në fazën e tretë të provave, Instituti raportoi se vaksina kishte efektivitet në mbi 91% të rasteve. Por, shkencëtarët thonë se instituti nuk ofroi të dhëna të papërpunuara në mënyrë që shkencëtarë të tjerë të bënin analiza të pavarura. Ata kanë kërkuar informacion shtesë nga ky institucion. “Nëse do të kishin ofruar materialet burimore, mund të ishin sqaruar disa nga mospërputhjet. Por nuk ofruan të dhënat. Prandaj ekzistojnë pikëpyetje mbi punën e tyre kërkimore”, thotë Vasili Vlasov i Universitetit

Ekonomik të Shën Peter- burgut. Nga ana tjetër, sh- kencëtarët e Institutit “Gama- leya” nënvizojnë se vaksina është miratuar për përdorim në mbi 50 vende. Por studiues të tjerë thonë se kjo nuk dëshmon që vaksina është e padëmshme dhe e efektshme në masën që thonë prodhuesit e saj. Prodhuesit e “Sputnik V” thonë se vaksina e tyre është e sigurt dhe se shkencëtarët perëndimorë paguhen nga “gjigandë farmaceutikë” për të bllokuar futjen e vaksinës ruse në treg. Por, studiuesit shkencorë thonë se prodhuesit e vaksinave të tjera, si “Johnson & Johnson” dhe “AstraZeneca” kanë punuar nga afër me agjencitë rregullatore për të garantuar një produkt të sigurt, gjë që s’ka ndodhur me laboratorët që krijuan “Sputnik V”. Organizata Botërore e Shëndetësisë thotë se shkencëtarët shpresojnë të mësojnë më shumë gjatë vizitave në Rusi. “Kemi krijuar një ekip që besoj se do të vizitojë fabrikën. Do të shkojnë në një numër objektesh gjatë vizitës”, tha zëdhënësja e OBSH-së. “Sputnik V” nuk bën aktualisht pjesë në listën e vaksinave të miratuara për përdorim emergjent nga BE-ja. Autorët e letrës në maj kritikojnë mungesën e transparencës në provat klinike me këtë vaksinë dhe thonë se çdo problem ekzistues mund të gjejë zgjidhje. Por, mëdyshjet për sigurinë dhe efikasitetin e vaksinës “Sputnik V” nuk kanë penguar shumë vende, në një betejë të ethshme me pandeminë, ta ofrojnë këtë vaksinë për imunizimin e popullatës së tyre. Miliona doza të kësaj vaksine janë bërë deri tani në Rusi dhe në vende të tjera.