Caktohet data, viti i ri akademik nis në 11 tetor
Deri në 30 shtator 2022, asnjë sinjal për mënyrën si do zhvillohet
Ende pa u mbyllur mirë ky vit akademik, ministrja e Arsimit ka firmosur urdhrin për vitin e ri akademik 2021-2022. Në dokumentin e firmosur që në datën 17 qershor (faksimile bashkëngjitur shkrimit) saktësohet 11 tetori si dita e parë e mësimdhënies, e cila do të zgjatë përgjatë një viti të plotë deri në 30 shtator të 2022-shit. Vetëm datë, asgjë më tepër mbi modalitetet e zhvillimit të tij. Kujtojmë që studentët kaluan një vit të tërë me mësim online. Pavarësisht se komiteti i ekspertëve dha lejen për t’u rikthyer në auditorë, shumica nuk e bënë për shkak të mungesës së akomodimit, gjetja e të cilit ishte e pamundur vetëm për sezonin e provimeve dhe disa ditë konsultime.
Por ajo që ka mërzitur kohët e fundit studentë janë informacionet e dhëna nga burime jozyrtare, se edhe semestri i parë i vitit që vjen do të zhvillohet online, si mësimi, ashtu edhe provimet. Bëhet fjalë për informacione që qarkullojnë në qarqet universitare, pasi asgjë nuk është bërë publike, sa kohë që jemi ende larg nisjes së vitit akademik, si dhe referuar një situate të qëndrueshme pandemike.
Sidoqoftë, tema e këtyre kohëve janë pranimet e reja në universitete. Ish-mat- urantët janë përfshirë nga ankthi nëse me pikët që kanë, fitojnë degën e preferuar. Ndërkohë, deri në fund të korrikut duhet të përllogarisin dhjetë profilet që i duan më shumë, bazuar në rezultatet e arritura gjatë shkollës së mesme dhe provimeve të fundit. Në fillim të muajit gusht bëhet plotësimi i formularit A2, ndërsa duhet të presin thuajse një muaj për të shuar kuriozitetin për një nga zgjedhjet më të rëndësishme të jetës: profesionin. Për joekselentët apo ata që këmbëngulin fort pas një dege, i pret një sagë e gjatë me raunde e faza regjistrimesh, që mund të bëhen vetëm pasi të rinjtë e shkëlqyer të lirojnë degët që mbajnë peng (janë me qindra që fitojnë dhjetë degë njëherësh). Regjistrimet janë parashikuar të mbyllen përpara 11 tetorit, me dërgimin e listave të studentëve të rinj për matrikullim në Qendrën e Shërbimeve Arsimore dhe Ministri.