LLOGARITJA E RE Pensionet, shtesë 16% për të gjitha kompensimet
Nga dritat te përjashtimet nga detyrimet lokale dhe taksa e shtëpisë, del llogaritja e re për rritjen e pensioneve. Në total shtesa varion nga 10 deri në 15 për qind në muaj
Pensionistët vazhdojnë të marrin 150 lekë në muaj kompensim për diferencën e çmimit të bukës, 350 lekë në muaj si kompensim për energjinë elektrike dhe 414 lekë në muaj për çdo pjesëtar të familjes që është në varësi ekonomike të pensionistit, si edhe 648 lekë pas heqjes së fashës për konsum deri në 300 kilovatë
Gati 10 për qind shtesë mbi pensionin marrin pensionistët, të cilët janë pjesë e skemës së kompensimit të dritave.
Kjo pasi vlera e rimbursimit shkon deri në 1600 lekë në muaj dhe në raport me pensionin mesatar, që është rreth 16 mijë lekë, “shtesa” që përfitohet nga kompensimi i dritave është relativisht e lartë, rreth 10 për qind. Por përveç kësaj, pensionistët janë të përjashtuar nga taksa e banesës, taksa e përkohshme për infrastrukturën arsimore dhe pagesa e tarifës së pastrimit dhe largimit të mbeturinave, të cilat të gjitha bashkë kanë një vlerë rreth 900 lekë në muaj. Në këto kushte, masa e përfitimit shkon deri në 2500 lekë në muaj, ose 16 për qind shtesë mbi pensionin.
KOMPENSIMET
Konkretisht, pensionistët vazhdojnë të marrin 150 lekë në muaj kompensim për diferencën e çmimit të bukës, 350 lekë në muaj si kompensim për energjinë elektrike dhe 414 lekë në muaj për çdo pjesëtar të familjes që është në varësi ekonomike të pensionistit, si edhe 648 lekë pas heqjes së fashës për konsum deri në 300 kilovatë. Rreth 1600 lekë është shuma që përfitohet shtesë dhe për të qenë pjesë e skemës, ka vetëm dy kushte. Së pari, duhet që pensionisti të mos ketë të ardhura të tjera veç pensionit. Kushti tjetër është që fatura e dritave të shtëpisë për të cilën do të paguhet taksa, të jetë në emër të pensionistit. Në rastin kur janë dy pensionistë, pra burrë e grua, kompensimin e përfiton vetëm njëri prej tyre. Për të aplikuar duhet të dorëzojnë një fotokopje të kartës së identitetit, certifikatën familjare, si dhe fotokopje të librezës së energjisë elektrike, me anë të së cilës vërtetohet se energjia elektrike paguhet në mënyrë të rregullt.
PËRJASHTIMI NGA TAKSAT
Nga ana tjetër, taksa që aplikohet për banesën nuk është e njëjtë për të gjithë. Vlera e saj përcaktohet mbi bazën e sipërfaqes së banesës dhe çmimin e referencës. Nga kjo taksë nuk përjashtohen as bizneset, garazhet dhe bodrumet, për të cilat ndryshon vetëm përqindja që do të aplikohet për llogaritjen e taksës, e cila nuk do të jetë 0.05, por 0.02%. Nisur nga tabela zyrtare me çmimet për çdo zonë kadastrale, për sipërfaqen 100 metra katrorë taksa e re që rëndon në xhepat e konsumatorëve varion nga 3000 lekë deri në 9500 lekë në vit. Pensionistët kryefamiljarë, të cilët nuk kanë të ardhura të tjera veç pensionit, janë të përjashtuar nga kjo taksë. Me një llogaritje të thjeshtë, vetëm nga përjashtimet e taksave bashkiake një pensionist kryefamiljar mund të shmangë nga fatura mujore rreth 900 lekë detyrime. Për këtë mjafton vetëm që kryefamiljari të jetë pensionist dhe në certifikatën familjare ose të jetojë i vetëm me bashkëshorten (po pensioniste), ose asnjë nga familjarët e tjerë të mos ketë të ardhura.
PËRFITUESIT
Nga të dhënat e ISSH-së mësohet se janë mbi 140 mijë pensionistë në të gjithë vendin të cilët përveçse janë në skemën e rimbursimit të dritave, nuk preken as nga taksa e banesës. Por nga të dhënat e deritanishme mësohet se janë vetëm 16,618 familje në kryeqytet që kanë përfituar deri më tani zerim të taksës për shtëpinë, nga të cilat 16,080 pensionistë, 473 invalidë dhe 65 familje që trajtohen me ndihmë ekonomike.