Nga zgjedhja e kandidatëve për kryebashkiakë te zgjerimi i kryesisë, ja propozimet e Bashës për statutin e ri të PD
GAZETA ZBULON DOKUMENTIN ME KERKESAT E KRYETARIT TE OPOZITES. SI PRITET TE REFORMOHET E GJITHE PD
Partia Demokratike do të ndryshojë rregullat e përzgjedhjes së kandidaturave për kryetarë bashkish. Kryetari i Partisë Demokratike, Lulzim Basha, në propozimet e tij kërkon që kandidatët për kryetarë bashkish të propozohen nga kryetari i partisë, të caktohen nga kryesia dhe lista e plotë të miratohet nga Këshilli Kombëtar. Sipas ndryshimeve që pritet të ndodhin, kandidaturat për zgjedhjet në pushtetin vendor seleksionohen në bashkëpunim dhe konsultim aktiv me anëtarët e PDSH-së. Pas konsultimit me anëtarësinë, kandidaturat për organe ekzekutive të pushtet vendor propozohen nga kryetari i partisë, caktohen nga kryesia e PDSH-së dhe lista e plotë miratohet nga Këshilli Kombëtar. Kryesitë e degëve vendosin për kandidaturat e këshilltarëve në njësitë vendore. Kryesia e PDSH-së duhet të informohet për çdo hap të procesit të miratimit të kandidatëve dhe ka të drejtën e ndërhyrjes sa herë që e vlerëson të domosdoshme. Përjashtimisht për bashkitë që janë qendër qarku lista e këshilltarëve propozohet nga kryesia e degës dhe miratohet nga Kryetari i Partisë.
PROPOZIMET E KREUT TË PD-SË PËR STATUTIN NENI 12 ZGJEDHJA E FUNKSIONARËVE POLITIKË NË NIVEL QENDROR APO LOKAL
1. Demokracia e brendshme dhe kolegjialiteti zbatohet edhe në përcaktimin e kandidaturave elektorale të partisë. Anëtarët e partisë kanë të drejtën e identifikimit dhe propozimit të kandidaturave të mundshme elektorale, sipas rregullave dhe kushteve të përcaktuara në aktet nënstatutore.
2. Kandidaturat për zgjedhjet në Kuvendin e Shqipërisë seleksionohen në bashkëpunim dhe konsultim aktiv me anëtarët e PDSH-së. Pas konsultimit me anëtarësinë, me propozim të kryetarit të partisë, kryesia e PDSH-së vendos listën përfundimtare të kandidaturave elektorale për Kuvendin e Shqipërisë. Kjo listë i paraqitet për miratim Këshillit Kombëtar të PDSH-së.
3. Kandidaturat për zgjedhjet në pushtetin vendor seleksionohen në bashkëpunim dhe konsultim aktiv me anëtarët e PDSHsë. Pas Konsultimit me anëtarësinë, kandidaturat për organe ekzekutive të pushtet vendor propozohen nga kryetari i partisë, caktohen nga kryesia e PDSH-së dhe lista e plotë miratohet nga Këshilli Kombëtar. Kryesitë e degëve vendosin për kandidaturat e këshilltarëve në njësitë vendore. Kryesia e PDSH-së duhet të informohet për çdo hap të procesit të miratimit të kandidatëve dhe ka të drejtën e ndërhyrjes sa herë që e vlerëson të domosdoshme. Përjashtimisht për bashkitë qendër qarku, lista e këshilltarëve propozohet nga kryesia e degës dhe miratohet nga kryetari i partisë.
4. Rregullat e detajuara për realizimin e procesit të propozimit, përzgjedhjes, konsultimit dhe caktimit të kandidaturave elektorale të partisë përcaktohen në aktet nënstatutore.
NENI 44
KËSHILLI KOMBËTAR 1. Këshilli Kombëtar, në përputhje me programin, statutin dhe vendimit e Kuvendit Kombëtar, drejton veprimet politike të partisë në periudhën midis dy kuvendeve. Ai merr të gjitha vendimet e rëndësishme politike që mund të kërkojnë rrethanat dhe kur ato nuk janë parashikuar në këtë statut, si e drejtë vetëm e Kuvendit.
2. Këshilli Kombëtar përbëhet nga anëtarë për shkak të funksionimit dhe anëtarë të zgjedhur nga Kuvendi Kombëtar. Janë anëtarë të Këshillit Kombëtar për shkak të funksionit:
Anëtarët e kryesisë së partisë, anëtarët e kolegjit të kryetarëve, deputet dhe ministrat në detyrë, anëtarë të PDSH-së, kryetarët e bashkive dhe kryetarët e këshillave të bashkive dhe të qarkut që i përkasin Partisë Demokratike.
3. Kuvendi Kombëtar zgjedh me votë të fshehtë jo më pak se 150 anëtarë të Këshillit Kombëtar, nga një listë e propozuar nga Kryetari i Partisë, ku numri i kandidatëve të mos jetë më pak se 1.5 herë më i madh se numri i vendeve që do të shpallen fitues dhe që njoftohen paraprakisht me vendim të kryesisë së partisë. Numri minimal i anëtarëve të zgjedhur të Këshillit Kombëtar nga gjinia më pak e përfaqësuar të mos jetë më pak se 30 për qind, ndërkohë që numri i të rinjve deri në moshën 35 vjeç të mos jetë më pak se 15 për qind. Nëse kuotat e mësipërme nuk plotësohen nga renditja e dalë pas votimit, atëherë renditja e tyre veçohet nga ajo e përgjithshmja.
5. Këshilli Kombëtar, si rregull, mblidhet jo më pak se një herë në vit. Data e mbledhjes dhe rendi i ditës duhet t’u njoftohet anëtarëve jo më vonë se 5 (pesë) ditë para zhvillimit të mbledhjes.
Mbledhjen e Këshillit Kombëtar e thërret kryetari i partisë ose kryesia e partisë. Këshilli Kombëtar mund të mblidhet edhe nëse e kërkojnë 1/4 e anëtarëve të tij. Në këtë rast, kryetari thërret mbledhjen jo më vonë se dy javë nga data e depozitimit të kërkesës. Këshilli Kombëtar ushtron këto përgjegjësi apo të drejta: a)Vendos për emërimin dhe shkarkimin nga detyra të Sekretarit të Përgjithshëm, nënkryetarëve të partisë, anëtarëve të zgjedhur të kryesisë së PDSH-së, sekretarëve funksionalë, kryetarit dhe anëtarëve të Komisionit të Apelimit, Integritet dhe Etikës, Kryetarit dhe anëtarëve të Komisionit Zgjedhor, si dhe kryetarit dhe anëtarëve të bordit Financiar të partisë.
b) Miraton anëtarët e emëruar nga kryesia e PDSH-së në Komisione.
c) Miraton listën e kandidaturave elektorale sipas vendimit të kryesisë së PDSH-së.
ç) Miraton strategjitë dhe programin elektoral e politik të PDSHsë. d) Miraton koalicionet para apo pas zgjedhore. dh) Shpall masat disiplinore për anëtarët e këshillit Kombëtar apo kryesisë së PDSH-së.
e) Miraton aktet më të rëndësishme nënstatutore për mbarëvajtjen e punës në parti sipas vlerësimit dhe propozimit të Kryesisë së PDSH apo kryetarit të Partisë.
7. Të drejtën për t’i propozuar vendime Këshillit Kombëtar e kanë Kryetari i Partisë ose Kryesia e Partisë. Jo më pak se 15 për qind e anëtarëve të Këshillit Kombëtar kanë të drejtën që jo më vonë se 24 orë përpara mbledhjes së tij, të propozojnë kandidatët alternativë për çdo funksion publik që zgjidhet nga ky organ. Vendimet e Këshillit Kombëtar merren me shumicë të thjeshtë. Në rastin e masave disiplinore vendimet e Këshillit Kombëtar merren me 2/3 e votave. Mbledhja e Këshillit Kombëtar nuk mund të zhvillohet pa praninë e më shumë se gjysmës së të gjithë anëtarëve.
8. Anëtarët e zgjedhur të Këshillit Kombëtar organizohen në Departamente të Këshillit Kombëtar, që funksionojnë si strukturë Këshillimore e Kryesisë dhe Kryetarit të PDSH-së për çështje tematike. Numri i Departamenteve, fusha e veprimtarisë që mbulojnë drejtuesit si dhe ndarja anëtarëve në to, përcaktohen me vendim të Këshillit Kombëtar, me propozim të Kryetarit të Partisë. Departamentet e Këshillit Kombëtar janë përgjegjëse për përgatitjen e platformave, opinioneve, strategjive dhe programeve sektoriale, të cilat shërbejnë për formulimin e programit elektoral, programit të qeverisjes dhe veprimtarinë politike të PDSH-së. Departamentet sigurojnë koordinimin e veprimtarisë në fushat që mbulojnë ndërmjet partisë dhe grupit të saj parlamentar. Departamentet përgjigjen për punën e tyre pranë Kryetarit të Këshillit dhe Sekretarit të Përgjithshëm. Çdo vit ato hartojnë një raport për veprimtarinë vjetore, i cili i paraqitet për njohje Kryetarit të Partisë.
NENI 45 KRYESIA E PDSH-SË
1. Kryesia e PDSH-së ndjek dhe siguron zbatimin e vendimeve të marra nga Kuvendi dhe Këshilli Kombëtar. Kryesia vendos për të gjitha çështjet që nuk janë e drejtë ekskluzive sipas këtij statusi e Kuvendit Kombëtar dhe Këshillit Kombëtar, si dhe miraton marrëveshjet Politike.
2. Kryesia e PDSH-së drejtohet nga kryetari i partisë dhe ka në përbërje edhe: a) Sekretarin e Përgjithshëm b) Nënkryetarët e partisë c) Sekretarët funksionale ç) Kryetarin e Këshillit Kombëtar d) Kryetarët e organizatave partnere dh) Kryetarin e Bordit Financiar, Komisionit Zgjedhor dhe Komisionit të Apelimit, Integritet dhe Etikës.
c) 15 anëtarë të zgjedhur me votim të fshehtë nga Këshilli Kombëtar, nëpërmjet një numri kandidaturash të paktën sa dyfishi i numrit të vendeve vakante. Jo më pak se 30 për qind e anëtarëve të zgjedhur të kryesisë duhet t’i përkasin gjinisë më pak të përfaqësuar.
e) Zëdhënësi i Partisë, si dhe Sekretari për marrëdhëniet Ndërkombëtare, që emërohen nga Kryetari i PDSH-së. Kryesia ka këto përgjegjësi dhe të drejta: a)Emëron kryetarin dhe anëtarët e Komisionit të Vlerësimit të Kandidatëve; b) Emëron Sekretarin e Degës së PDSH-së; c) Miraton kandidatët për kryetarë të degëve të PDSH-së; ç) Miraton kandidatët për kryetar bashkish d) Cakton kandidatët për deputetë, pas konsultimit me anëtarësinë e PDSH-së, sipas parimit “Një anëtar, një votë”. Lista e Kandidatëve për deputetë i paraqitet për miratim Këshillit Kombëtar;
dh) Ka të drejtë të vendosë për thirrjen e Kuvendit për zgjedhje të reja të degës së Partisë dhe caktimin e organeve drejtuese të përkohshëm të degës në përputhje me këtë statut
e) Miraton strukturën organike të PDSH-së dhe atë të pagave;
ë) Ka të drejtë t’i adresohet secili prej anëtarëve të saj, edhe çdo kryesi dege e organizatë partnere;
f) Ndërhyn dhe mund të refuzojë kandidaturat e përzgjedhura nga organet vendore të partisë.
NENI 51 KOMISIONI I VLERËSIMIT TË KANDIDATËVE
1.Komisioni i Vlerësimit të Kandidatëve është strukturë dhe ka në përbërje 5 anëtarë. Anëtarët e Komisionit të Vlerësimit të Kandidatëve, me propozim të Kryetarit të PDSH-së, emërohen nga Kryesia e PDSH-së dhe miratohen nga Këshilli Kombëtar.
2. Komisioni i Vlerësimit të kandidatëve shqyrton kandidaturat e propozuara nga strukturat lokale të partisë dhe atyre të vetëpropozuara për zgjedhjet në Kuvendin e Shqipërisë.
3. Komisioni i Vlerësimit të Kandidatëve i raporton Kryetarit të Partisë dhe Kryesisë së PDSH-së mbi përmbushjen nga kandidatët të kritereve të parashikuara formale, atyre të pastërtisë së figurës, si dhe elementëve të tjerë të nevojshëm për ecurinë në karrierë sipas këtij statuti.
4. Kriteret që duhet të plotësojnë kandidatët miratohen më akte nënstatutuore dhe lidhen kryesisht, por pa u kufizuar, me arsimin, integritetin, ligjshmërinë e pasurisë, të shkuarën gjatë regjimit komunist, mospasjen e rekordeve kriminale, si dhe standardet dhe rregullat që garantojnë integritetin dhe etikën.
5. Çdo kandidat është i detyruar që të plotësojë një vetëdeklarim mbi të dhënat e tij, si dhe të paraqesë çdo dokument të kërkuar nga Komisioni i Vlerësimit të Kandidatëve, që provon përmbushjen e kritereve dhe standardeve të përcaktuara.