Meta pret kryetaren e opozitës bjelloruse
“Shqipëria qëndron në krah të aspiratave demokratike të popullit bjellorus”
Kryeministri Edi Rama ka zhvilluar dje një takim me kryetaren e opozitës në Bjellorusi, Sviatlana Tsikhanouskaya. Lajmin e ka bërë të ditur vetë kreu i qeverisë përmes një postimi në “Facebook” teksa ka publikuar edhe një foto me mbishkrimin: “Me Sviatlana Tsikhanouskaya, udhëheqësja e Lëvizjes së Demokracisë në Bjellorusi”, shkruan Rama. Kryetarja e opozitës bjelloruse, Sviatlana Tsikhanouskaya zhvilloi sot vizitën e saj të parë në vendin tonë, me ftesë të Kryeministrit Edi Rama. Në një postim para vizitës, Tsikhanouskaya theksoi se me Kryeministrin Rama do të diskutojë për rolin e Shqipërisë në OSBE, sa i përket krizës në Bjellorusi. “Jam e lumtur të njoftoj vizitën time në Shqipëri më 29 shtator, me ftesë të Kryeministrit Edi Rama. Unë do të diskutoj angazhimin e Shqipërisë në OSBE në lidhje me krizën e Bjellorusisë dhe anëtarësimin e ardhshëm të Shqipërisë në Këshillin e Sigurimit të Kombeve të Bashkuara”, shkruante ajo në një postim në “Twitter”. Më herët, Presidenti Ilir Meta ka takuar kreun e opozitës bjelloruse, Sviatlana Tsikhanouskaya. Përmes një postimi në “Facebook”, Meta shkruan se Shqipëria do të qëndrojë krah aspiratave demokratike të popullit bjellorus. Kreu i shtetit ka uruar kreun e opozitës për lidershipin e dëshmuar teksa thotë se liria e medias dhe mbajtja e zgjedhjeve të lira janë të rëndësishme për të ardhmen e Bjellorusisë. “Kënaqësi të takoja sot udhëheqësen e guximshme të opozitës bjelloruse, znj. Sviatlana Tsikhanouskaya. I urova shumë suksese në misionin, përpjekjet frymëzuese dhe lidershipin e dëshmuar. Lirimi i të burgosurve politikë, liria e medias dhe e shprehjes, si dhe mbajtja e zgjedhjeve të lira e të ndershme janë tepër të rëndësishme për të ardhmen demokratike të Bjellorusisë. Shqipëria qëndron në krah të aspiratave demokratike të popullit bjellorus!”, shkruan Presidenti Meta.