Debati me dyer të mbyllura, Bushati: Ka shndërruar Kuvendin në një tallava
Opozita nuk e mori dot fjalën në Komisionin e Veprimtarisë Prodhuese dje, ku maxhoranca kërkoi që mbledhja të zhvillohej online, sipas vendimit të Konferencës së Kryetarëve, ndërsa ligjvënësit demokratë ishin prezentë në sallë. Kryetari i Komisionit, Arben Pëllumbi, njoftoi se kur të vaksinohen të gjithë deputetët, atëherë mbledhjet do të zhvillohen me praninë fizike. “Është marrë vendimi që mbledhjet e Komisioneve do të zhvillohet online. Kolegët e opozitës ndodhen prezentë në sallë, qëndrimi i tyre dihet. Unë do të kisha dëshiruar që në mbledhjen hapëse të ishim bashkë dhe ta kishim zhvilluar normalisht. Por nuk varet nga unë. Kemi një vendim të Konferencës së Kryetarëve dhe unë jam i detyruar ta zbatoj. Është e pamundur ta bëjmë me prezencë fizike. Në rast së dëshironi të merrni pjesë në mbledhje duhet të logoheni edhe këtu ku jeni. Më vjen mirë që ruani distancën. Ne kemi kërkuar që të gjithë deputetët të kryejnë procesin e vaksinimit. Jam i bindur se me përfundimin e këtij procesi do të bëjmë të mundur edhe realizimin e mbledhjeve në mënyrë fizike”, tha Pëllumbi. Nga ana e tij, nënkryetari i këtij komisioni, Helidon Bushati, tha se maxhoranca e ka shndërruar Kuvendin në një tallava. “Ne jemi që mbledhja të zhvillohet vetëm me prezencë fizike. Ju po e bëni Parlamentin tallava, zoti kryetar. Prej dy ditësh në Parlamentin shqiptar po luhet komedi”, tha Bushati. Në fund të mbledhjes, e cila ka zgjatur më pak se 5 minuta, një nga deputetët e opozitës shtyn kompjuterin e kryetarit të Komisionit, ndërsa është vënë re edhe prezenca e Gardës.