Kreu i PD-së lajmëron bashkëpunim me PS për Reformën Zgjedhore

Basha: Do t’i çojmë shumë shpejt Kuvendit kërkesën për ngritjen apo për vazhdimin e punës për Reformën Zgjedhore, por kjo nuk mjafton

Kryetari i Partisë Demokratike, Lulzim Basha, por dhe LSI-ja dha dje mesazhe për të bashkëpunuar me maxhorancën për reformën zgjedhore sipas rekomandimeve të OSBE/ODIHR-it për zgjedhjet e 25 prillit.

Mesazhe bashkëpunimi me opozitën dha dje edhe sekretari i Përgjithshëm në PS-së, Damian Gjiknuri. Siç e kishte parashikuar dhe gazeta “Panorama” dy muaj më parë, reforma zgjedhore do të ishte një nga çështjet që do të ulte në tryezën e bashkëpunimit opozitën dhe maxhorancën dhe duket se palët po shkojnë drejt këtij qëllimi. Në një prononcim për mediat pas takimit me shefen e misionit të OSBE-ODIHR për monitorimin e zgjedhjeve, Urszula Gacek dhe delegacionin e OSBE/ODIHR, Basha tha se, “ky raport fakton masakrën zgjedhore”. “Raporti po kështu, flet qartësisht për problemin madhor të blerjes së votave, i cili në bashkëpunim me krimin e organizuar jo vetëm nuk u zgjidh me 25 prill, por mori dimensione të reja duke prodhuar të tjerë faktorë të krimit nën petkun e deputetit në atë sallë që në fakt duhet të jetë tempull i demokracisë. Pra, këto janë ato që ndava pak a shumë, por e informova gjithashtu që ne kemi një dhe vetëm një arsye që jemi në atë parlament. Ne jemi aty në funksion të kthimit të demokracisë së kthimit të legjitimitetit në vend dhe që të ndodhë kjo duhet patjetër që të gjitha këto probleme që raporti i ka dokumentuar, por në fakt i kemi dokumentuar dhe ne në librin e zi që i kemi dërguar pothuajse një javë para publikimit të raportit të tyre, gjithë institucioneve ndërkombëtare, por që në fakt shqiptarët i dinë fare mirë. Të gjitha këto probleme të marrin zgjidhje nuk mjafton thjesht dhe vetëm një reformë zgjedhore, për të cilën pa diskutim Partia Demokratike është e vendosur dhe për të cilën kemi ngritur një grup pune të kryesuar nga nënkryetari i partisë dhe nga nënkryetari i Kuvendit, zoti Enkelejd Alibeaj, dhe që do t’i çojmë shumë shpejt Kuvendit kërkesën për ngritjen apo për vazhdimin e punës për reformën zgjedhore, po kjo nuk mjafton, sepse regjimi me 25 prill dhe të gjitha muajt para 25 prillit dhe pas 25 prillit deri në procesin e ankimimeve, shkeli dhe ato rregulla që kishte aprovuar vetë, pa opozitën, pa Partinë Demokratike, pa aleatët tanë”, theksoi Basha. Pra, shtoi Basha, “qartësisht në këtë vend nuk duhet thjeshtë një reformë zgjedhore, por duhet një shkundje e thellë në mënyrë që instrumentet e regjimit të mos funksionojnë më dhe vendi të kthehet në demokraci. Dy mekanizmat kryesorë për të ecur drejt kësaj janë pa diskutim, t’iu japim shqiptarëve jo thjesht legjislacionin, pra Kodin Zgjedhor, Kodin Penal, ndryshime të tjera, ndryshime për të garantuar lirinë e medies, por edhe instrumentet që garantojnë që ky legjislacion do të zbatohet nuk do të mbetet në letër, se jam i bindur që ligje të mira ka edhe Lukashenko, por Shqipëria nuk mund të jetë dhe nuk mund të bëhet Bjellorusi”. “Me këtë raport, Shqipëria sot nuk ka asnjë ndryshim nga Bjellorusia. Po t’i heqësh fjalën Shqipëri raportit, është Bjellorusi. Ndaj beteja jonë është e qartë dhe ne do të bëjmë gjithçka me pushtetin që na kanë dhënë shqiptarët, pavarësisht na e reduktoi masakra zgjedhore, por kemi prapë mjaftueshëm fuqi që t’i imponojmë një axhendë, një kalendar, veprimi popullor, qytetar, një platformë qytetare për demokracinë, sigurisht duke përdorur edhe fuqinë tonë brenda parlamentit në funksion të kthimit të zgjedhjeve të lira dhe të ndershme”, tha Basha. Kryetari

i Partisë Demokratike, Lulzim Basha, deklaroi sot se, raporti i OSBE-ODIHR fakton masakrën zgjedhore, “konfirmoi shkrirjen në një, të shtetit me partinë”.