Rritja e çmimit të bukës, PD kërkon në seancë dëgjimore Autoritetin e Konkurrencës
Opozita kërkon nisjen e hetimeve për shkaqet e rritjes e çmimit të miellit dhe bukës. Nënkryetarja e PD-së, Jorida Tabaku, në emër të opozitës ka kërkuar dje në Komisionin e Ekonomisë sqarime për situatën e krijuar në vend me rritjen e çmimeve. Tabaku kërkoi që brenda 3 javëve, Autoriteti i Konkurrencës duhet të thirret në një seancë dëgjimore në këtë komision, për të mësuar më shumë mbi faktorët që kanë shkaktuar këtë rritje, pasi deputetët dhe qytetarët kanë nevojë për transparencë. Nënkryetarja e PD-së e shoqëroi kërkesën e saj me argumentin se kjo rritje nuk varet nga faktorë të jashtëm, por të brendshëm, ndaj sipas saj është e rëndësishme që autoriteti të hetojë dhe japë sugjerime për çfarë ka ndodhur në treg pa qenë vonë. Si anëtare e Komisionit përgjegjës, Tabaku u shpreh se kërkesa e saj për interpelancë mbështetet edhe nga kolegët e saj të maxhorancës, të cilët kanë nevojë të dinë të vërtetën për të dhënë edhe ata sugjerimet e tyre. “Kemi çështje shumë sensitive për të diskutuar. Besoj që kam mbështetjen edhe të kolegëve socialistë, përveç kolegëve të PD-së, këtu për të thërritur Autoritetin e
Konkurrencës në seancë dëgjimore. Rritja e çmimit të bukës dhe miellit brenda 1 dite, marrja e një iniciative për hetim në treg pa dalë me konkluzion nga Autoriteti, dhe situata e krijuar, na detyron ne si Komision të jemi të përgjegjshëm, për ata që na kanë votuar, të na prezantojnë çfarë ka ndodhur, situatën, pse është rritur çmimi. Besoj që janë të gjithë të ndërgjegjshëm që kjo është një situatë që nuk varet nga situatë e jashtme, brenda 3 javëve të thërrasim Autoritetin e Konkurrencës, të hetojmë dhe të ketë sugjerime nga operatorët, besoj që deputetët e këtij komisioni kanë nevojë për transparencë. Komisioni duhet të thërrasë Autoritetin, të merren masa të hetojmë çfarë ka ndodhur në treg sa nuk është vonë e të jepen sugjerime”, tha Tabaku në Komisionin e Ekonomisë.